No.1908/2020-2021

Dated Serchhip, the 11th June, 2020: Vawiin Green Mizoram Day, 2020 denchhen hian Serchhip District Level Committee on Green Mizoram chairman Dr. Lalzirmawia Chhangte, IAS leh Superintendent of Police Pu R. Sathyasundaram, IPS te, Pu HD Lalpekmawia, Addl. DC leh official dang ten Thenzawl leh Serchhip inkar kawngpui kamah thing phunna hun an hmang.

Day pual thing phunna hun tawi, kawngpui kamah buatsaihah hian Dr. Lalzirmawia Chhangte chuan thutawi sawiin, thing leh maute leh mihringte nunna hi thuk takin a inlaichin tih kan hre tlang vek a. Kan neih sa te humhalha, kan neih belh zel theihna tura phun belh zel a pawimawh hle a ni. Kumina Green Mizoram Day thupui chu “Tun hi thing phun hun chu a ni’ tih a nih angin leh Bible ah ngei pawh “Phun hun a awm” tih kan hmuh angin a phun hun lai hian a thei apiangten mahni remchanna hmunah phun ila. Thing leh mau leh nungcha humhalh kawng tinreng hi mipuiin ngaihven ila, mipuiin thukhat vuain hma la tlang ila a hlawhtling zual dawn a ni, a ti. Total Lockdown kal mek avangin kum dang angin Green Mizoram Day hmang thei lo mahila, Thenzawl DFO leh a thawhpuite hmalaknaa Day pual Thing phun huntawi kan buatsaih chu lawmawm hlea a hriat thusawiin, thawktute chungah lawmthu a sawi a ni. Thutawi a sawi zawh hian Bawrhsap hian thing a phun zuia, chumi hnuah Pu R. Sathiyasundaram, IPS, SP leh Pu HD. Lalpekmawia, Addl. DC te, chanchinbumite leh midang ten an phun zui veleh a ni.

Vawiin Green Mizoram Day pual Thingphun hi Pi Margaret Lalramchhani, DFO Thenzawlin a kaihruaia, Thenzawl RO Pu F. Lalsangzuala leh Serchhip RO Pu Lalsangpuia Pachuau leh EF&CC thawktu te leh chanchinbumiten he hun hi an telpui a ni.

Serchhip Thenzawl road kama vawiina phun hi thing 32 vel a ni a, district chhung hmun hrang hrangah vawiin phun zat erawh thing 520 a ni thung. Vawiina thing tiak phunte hi Tall seedling vek niin, feet hnih aia sang vek an ni. Tin, Green Mizoram Day 2020 pual hian EF& CC te chuan nikum lama Serchhip leh Thenzawl inkara lo phun tawh zawng zawng te an tifai vek a ni.