No.3289/2020-2020

Mizoram Police ui fing “Canine Squad” member 8 chu vawiin khan Home Minister Pu Lalchamliana hovin lakluhna inkhawm G.S. Arya Mess, PHQ, Aizawlah neih a ni.

Canine Squad lakluhna inkhawmah Home Minister chuan thusawiin, vawiin hi Mizoram tan leh Mizoram Police tan ni chhinchhiahtlak a ni a, kum 20 liam ta ah khan Dog Squad kan lo nei tawh thin a, thang hnih lian zet a ral hnu ah Canine Squad tha tak kan nei leh thei hi a lawmawmin Mizoram mipuite mi tithlamuangtu an nih ngei ka beisei a ni, a ti. Home Minister chuan ui fing 8 kan neih thar zinga 3 hi misual hnu chhui thiam an ni a, Mizoram leh khawvelin kan buaipui em em ruihhlo (drugs) hnim a chhhui chhuak thei 3 leh puakthei thil (explosives/bomb) chhui thei 1 kan nei bawk a, mibo leh vanduai thil – in chim etc. a awm a mihring zawng chhuak thei (search & rescue) 1 kan nei bawk a, Mizoram tan an tangkai em em dawn a ni, a ti.

Pu Lalchamliana chuan kan ram hi kan ralmuang a, chutih rualin hmun tinah drugs kaihhnawih thilah buaina kan tawk a, ruk ruk leh tualthahna a awm fo bawk a, heng atan hian Canine Squad hi an tangkai dawn a, sawrkar laipuiin a leina tur leh training pekna tur pawisa min pe a, a enkawlzui a hautak dawn a, Mizoram sawrkarin hei hi chu a ngaihtuah dawn a ni, a ti a. Ui enkawltu tur Handler leh Asst. Handler te rim taka training an neih hnu ah hlawhtling taka an hlen chhuak chu a lawmpui thu sawiin, an ui enkawlte hmangaih leh duat tak, an fate ang tluk hiala enkawl uluk tura chahin, an chungah Mizoram mipuite mit a fu reng dawn a ni, a ti.

Mizoram Police te COVID-19 boruaka an tangkaina leh thawhrimna fakin, mipuite pawhin hei hi a takin an hmu a, social media hmang diklo, mipui ti chi-ai thinte chhuichhuah kawngahan hnathawh a chhuanawm a tih thu a sawi a ni.

Kum 2018-2019 khan Narcotic Control Bureau, Ministry of Home Affairs, Govt, of India chuan Mizoram chhunga dan lova ruihhlo tawlh rukna beih letna hmanraw pakhat atan Canine Squad dinna turin cheng nuai 18.40 Mizoram Police hnenah a sanction a.

Hemi atan hian PHQ chuan Tender tichhuakin, uluk takin ui note supply-tu tur hi thlangin, sipai leh Police hnena ui tha chi supply kawnga hming tha uluk taka thlan niin, German Shepherd Dog (GSD) - 4 leh Labrador Retriever - 4 lei a ni. GSD pakhat hi Rs. 50,000/- leh Labrador Retriever hi Rs. 40,000/- in lei a ni.

Ui enkawltu tur (Handler leh Asst. Handler) hetiang lama tui mi engemaw zat atangin Handler - 8 leh Asst. Handler - 8 thlan chhuah an ni a. Anni hian National Training Centre for Dogs, BSF Academy, Tekanpur, Gwalior, Madhya Pradesh-ah October ni 7, 2019 atang khan training an tan a ni.

A hnuaia ziak ang hian heng Ui-te hi hna thiam bik (trade) hrang hrang nei turin, hun rei tak chhung training pek an ni. :
 

1.         Tracker                                    - 3 GSD                                   - 36 weeks

2.         Narcotic Detection                   - 1 GSD & 2 Labrador - 24 weeks

3.         Explosive Detection                - 1 Labrador                            - 24 weeks

4.         Search & Rescue                    - 1 Labrador                            - 24 weeks

Narcotic Detection, Explosive Detection and Search& Rescue Dog te hian ni 21.3.2020 ah training zovin, Tracker Dog-te hian ni 16.5.2020 khan an zo ve leh a ni. Uifingte hi Aizawl, Lunglei, Champhai leh Kolasib District-ah te dah an ni phawt ang a. A mamawh dan ang zelin hmun hrang hrangah hman an ni ang. Dog Handlers leh Asst. Dog Handlers te chu hengte hi an ni :- 

Vawiina ui fing lakluhna inkhawm hi Pu John Neihlaia, IPS, IGP (Hqrs) in a kaihruai a, Pu S.B.K. Singh, IPS, DGP, Mizoramin inlawmna thu sawiin, Dog Handlers leh Asst. Dog Handlers te hnenah an traning hlawhtling takin an zo tih hriattirna Certificate chu Home Minister hian a hlan a, Pu L.H. Shanliana, IPS, IGP (L&O) in lawmthu sawina hun a hmang a ni. 

Vawiina ui fing lakluhna inkhawmah hian Home Secretary, Pi Lalbiaksangi, MCS leh police hotuliante an tel a. Lakluhna inkhawm neih zawh hian G.S. Arya Mess tualzawlah ui fing ten an thiam thil an entir chhunzawm a  ni.