No.3288/2020-2020

Aizawl, the 21st July 2020 : Vawiin khan Sports & Youth Services enkawltu Minister Pu Robert Romawia Royte, Mizoram State Sports Council President ni bawk hovin Mizoram State Sports Council chuan SAD Conference Hall ah General Body Meeting an nei.

Minister Pu Robert Romawia Royte chuan COVID-19 hripui vanga harsatna awmin ram pum a tuam a, tum angin tumah an kal theihloh thu sawiin, hemi avang hian sports in a tuar nasa a, a Department ang pawhin a tuar nasa pawl kan ni, a ti. Inkharkhipna leh kaihhruaina avangin tun thlengin mipui punkhawmna tur infiamna buatsaih khap a la nih rih avangin infiammite fitness pawhin a tuar a rin thu a sawi a. Sports Association hrang hrang hruaitu kalkhawmte chu an infiammite mahni invawnga, in lamah theihtawpa tan la tura fuih turin a chah a ni.

Pu Robert Romawia Royte chuan Mizorama hmun 5 ah Sports School sakna tur leh District Sports Complex, Mamita sakna tur ruahmannate chu a fel tawh tih sawiin hemi atana sum ruahman first instalment chu sawrkar laipui chuan a releasd tawh tih a sawi. International leh National level a thleng tur chuan tih tak takna leh tumruhna nen tan lak a ngai a, Khelo India hnunhnung berah Mizoram tally chuan kan dinhmun a ti chiang a, tan lakna tur kan la nei tam viau niin a lang a ni, a ti.

India ram pumah sports hmasawnna tur atana nikum lama Sawrkar Lapuiin State Level-a Centre of Excellence 8 dinna turah Mizoram thlan a ni ve chu lawmawm tiin a puitlin nan theihtawp chhuaha hma lak mek a nih thu a sawi a. Chutihrualin India ram pumah District Level a Centre of Excellence 1000 dinna tur Sawrkar Laipuiin a puan tawh chu Mizorama District engemaw zatin an hmuh ngei a beisei tih a sawi.

Minister chuan Externally Aided Projects (EAP) kaltlangin nasa zawka infiamna hmunhma leh ruhrel te din tum a nih thu sawiin hemi atan hian Sawrkarin Sports chu industry ah a puan chuan kawngro thui tak a sut ngei a beisei tih a sawi bawk.

Sports Minister chuan Mizoram State Sports Council Secretary Pu C. Laltlanthanga pension-a chhuak tep chu a ui thu sawiin Mizorama sports leh thalai infiammite hmasawn nan a thawhhlawk hle a ti. Tunhnaia boral sports journalist Pu Francis Paul a ui thu a sawi bawk.

General Body Meeting-ah hian kum kaltaa Sports & Youth Services Department-in hmalakna leh hlawhtlinna a neih te chu Sports & Youth Services Director Pu Lalsangliana’n a sawi a. Mizoram Sports Policy January 2020 a Gazette tak te, industry-a sports puan te leh Sawrkar Laipuiin a ruahman hmaa Mizoramin Fit Mizoram Movement a lo kalpui tawh te chu kum kaltaa Minister thahnemngaihna leh Department hmalakna avanga hlawhtling thei a nih thu a sawi.

MSSC Secretary Pu C. Laltlanthanga hnen atangin Mizoram State Sports Council hmalaknate ngaihthlak a ni bawk a. General Body Meeting ah hian MSSC Annual Report 2019-20 pharh niin Report sawizauna hun neih a ni a. MSSC Annual Programme 2020-21 sawi zui niin Sports Association hrang hrang hruaitu kalkhawmten an ngaihdan te an sawi hnuah hmachhawp te hi an pawmpui a ni.

Mizoram State Sports Council hi kum 1976-a din niin Mizoram sports hmasawn nana sulsutu pawimawh tak a ni a. Council hnuaia Sports Association hrang hrang inziaklut leh zawm 32 an awm mek a ni.