Vawiin khan Mizoram Polytechnic Lunglei (MPL) chuan an din champha ‘Raising Day’ vawi 37-na Multipurpose Hall, MPL-ah an lawm. He ni pual hian National Service Scheme (NSS), Red Ribbon Club (RRC) leh Mizoram Polytechnic Student Union (MPSU) te tangkawp buatsaihin a thlawna thisen pek runpui ‘Blood Donation Camp’ buatsaih a ni. He hun hi Pi C.Lalremruati, Lunglei DIPRO-in a hmanpui.

Pi C. Lalremruati chuan Mizorama Polytechnic institute hmasa ber Raising Day vawi 37-na chu a lawmpui thu sawiin a mamawhte tana malsawmna ropui tak ‘Blood Donation Camp’ an buatsaih avangin an chungah lawmthu a sawi a. Sum leh pai seng lova mite tanpui theihna hlu ber leh awlsam ber chu a thlawna thisen pek hi a ni tiin khawvel thiamna hmanga siam chhuah theih loh thisen hlu tak, midang tana pek duhna thinlung neitute an fakawm tak zet a ni, a ti. Mizoram HIV/AIDS dinhmun pawh sawilangin Pi C. Lalremruati chuan Mizoram chu India rama HIV hluarna ber (Prevalence) leh HIV kai thar (New Infections Rate) tamna ber State kan ni mek a ni, a ti a. HIV/AIDS dona kawngah mitinten mawhphurna kan nei theuh a ni tiin HIV kai tam ber chu nunphung kaihhnawih a nih avangin zirlaite chu an nun uluk turin a chah bawk a ni.

MPL Principal Pu B.Lalhmuakluaia pawhin thu sawiin ‘Blood Donation Camp’ buatsaih tura thahnemngai taka hma la tu National Service Scheme (NSS), Red Ribbon Club (RRC) leh Mizoram Polytechnic Student Union (MPSU) te chungah lawmthu a sawi a. MPL chuan a thlawna thisen pek runpui kum khatah vawi hnih an buatsaih thin thu a tarlang a. Zirlaite chu thisen pek hlau lo tura fuihin thisen pe thinte chu thalai hrisel, dam thate an ni a, thisen pe thei tura hriselna an nei chu lawm nachang hre turin a chah a ni.

Vawiin thisen pek runpui hi Lunglei Civil Hospital Blood Bank doctor-te leh mithiam dangte kaihhruaina hnuaia neih niin  mi 68 (mipa – 57 leh hmeichhia - 11) ten a thlawnin thisen unit 68 an pe a ni.

Mizoram Polytechnic, Lunglei hi kum 1981-ah din niin tun dinhmunah zirlai 251 an awm a (mipa – 210, hmechhia - 41), staff 73 an awm a ni. He zirna in ah hian Mechanical Engineering, Civil Engineering, Electrical Engineering leh Computer Science Engineering course a awm bakah skill development lamah pawh zirtirna pek niin Community Development through Polytechnic leh Community College Scheme hnuaiah te thiam thil inzirtirna training buatsaih thin a ni bawk.