Sports Minister Pu Zodintluanga chuan Mizorama Sports Association hrang hrang te hmalakna chu a chhuanawmin ram pum leh ram pawn huap pawha tun aia sang dinhmun an luah chhoh zel a beisei. He thu hi vawiina Mizoram Premier League Under17 final match Aizawl Sipai Lammuala khelh a en naa a sawi a ni.

Minister chuan India ram bikah Football inkhelhna hi khawvel huap ang chuan a la sang tehchiam lova. Chutihlaiin Mizoram Football Association te chuan tumruhna nen Mizoram Premier League an buatsaih thei chu an thawhrimnaah a fak a. MFA hmalakna avang hian ramchhung football team lianah Zofa thalaite hmel hmuh tur a tam tawh hle a ni, a ti. Sports Association dang te pawhin ram chhung inelna hrang hrangah hmingthatna tam tak an tel tawh a, hei hi duhtawk mai lova hmalam pan zel turin infiammi leh Association hruaitute a fuih bawk.

MPL Under-17 ah hian team pariat an chhuak a. Group hniha then niin Group B champion Chanmari FC leh Group B Runners Up Dinthar FC te final-ah hian an intum a. Chanmari FC Under 17 team hian Goal 3-Goal 1 in Dinthar FC Under 17 te hi an hneh a ni. Mimal lawmman hrang hrang sem niin Top Scorer leh Best Player chu Jerry Mawimhmingthanga Chanmari FC, Best Defender Lalramthlamuana Dinthar FC, Best Goalkeeper Lalchhuanmawia Aizawl FC, Best Forward Malsawma Dinthar FC, Best Midfielder Vanlalremkima Aizawl FC niin Fairplay Award chu Dinthar FC ten an la a ni.