Vawiin khan Mizoram Primary Teachers Association (MPTA) chuan Vanapa Hall ah General Conference an hmang a. Parliamentary Secretary, School Education changtu Pu Joseph Lalhimpuia chu khuallian a ni.

Pu Joseph Lalhimpuia chuan Mizoramah zirna sikul hmasa ber din a nihna la reilohzia ngaihtuah chuan zirna kawngah hma kan sawn chak hle a, hemi kawngah hian a mawhphurhna pawimawh ber chelhtu chu zirtirtute an ni, a ti. Primary School zirtirtu a nghet lova thawkte tunhnaiah tam tak dah ngheh an nih bakah post ruak 169 lai hnawhkhah tumin sorkar chuan tan a la a, tun dinhmunah heng post ruak zat ve dawn lai hnawhkhah na turin MPSC hnuaiah exam neih a ni a, kumin financial year chhung ngei hian a dang zawng hnawh khah tumin tan an la chhunzawm dawn niin Parliamentary Secretary chuan a sawi. Pu Joseph Lalhimpuia hian Primary School awmsa 163 ah sorkarin pre-primary school siam a tum thu te, Treasury Square a education building hlui awm mek chu Education Centre atana chei that tum a nih thu te, Lunglei ah zirtirtute leh education department a thawkte thlenna tur khualbuk sak tum a nih thu te, thingtlang khaw hrang hrangah zirtirtute chenna tur quarters sak tum a nih thu te bakah School naupang te nen tanghova faina beihpui Zoram thenfai hnatlang neih tum a nih thu te a sawi bawk a ni.

Parliamentary Secretary Pu Joseph Lalhimpuia hian MPTA website thar mpta.org.in chu a hawng nghal bawk a ni.

MPTA General Conference, an President Pu H.Lalthlamuana kaihruaiah hian Pu R.Zonunmawia, General Secretary chuan an pawl hmalakna hrang hrang a tarlang a. He General Conference thupui “Mawhphurhna Hlen” hmangin Pu Vanneihtluanga’n thu a sawi a. All India Primary Teachers Federation Secretary General Pu S.Eswaran sunna hun hman a ni bawk.

Secretary Report-a tarlan dan chuan kumin February ni 3 khan Primary Contract Teachers mi 108 dah ngheh an ni a, kumin May ni 13 khan Department EV Teacher mi 211 dah nghehna tur order tih chhuah a ni a.Kumin August ni 20 khan Headmaster post ruak 290 dahkhahna tur order tihchhuah a ni bawk. All India Primary Teachers Association in Earned Leave kum khatah ni 30 leh kum 65 thlenga service an dilna thlawpin Yatra New Delhi a neihah Mizoram aiawhin mi pali an kal a ni.