Vawiin chawhma dar 11 : 00 khan I&PR Conference Hall, Saiha-ah R.T.I. Week, 2014 chu hlawhtling taka hman a ni.

He Week hmanna hi Pu John LT Sanga, Additional D.C., Saiha chuan a kaihruaia District Bawrhsap Pu Alok Swarup chu Khuallian niin Pu V.Zacho, Executive Secretary, M.A.D.C.chu Khualzahawm a ni. Sawihawnna leh kalkhawmte chawnglawmna thu Pu N.Vabeiratlua, I&PRO, chuan a sawi hnu-ah he Week hmanna-a Khuallian Pu Alok Swarup IAS, District Bawrhsap chuan thu sawiin RTI Act chu sawrkar langtlang leh dik siam nana a mipuite hmanrua pawimawh tak a nih piah lamah, mipuite sawrkar rorelna khawla tel vena (Participative spirit) pe tu pawimawh tak a ni, a ti. Mizoramah pawh a kum tela RTI Act hnuaia zawhna leh complaint lut tam tial tial chuan RTI Act Awareness-ah pawh hma kan sawn zel tih a entir a ni, a ti bawk. Mimal, Political Parties leh Tlawmngaipawl hrang hrang ten he RTI Act hmang hian an thil hriat duh te an zawt thei a. RTI zawhna te chu chhan anih loh chuan thuneitu sang zawk hnenah thlen leh zel theih anih thu sawiin he Dan hian mitinte dikna leh chanvo a humhalh tlat thu a sawi a, sawiselna leh zawhna te a awmloh chuan sawrkar tan chak taka kal a har a ni, a ti bawk.

He week hmanna-a Guest of Honour Pu V.Zacho, Executive Secretary, MADC chuan thu sawiin, sawrkar hnathawkte chuan , ‘Sawrkar hna chu Pathian hna a ni’ tih hi rilru-ah kan vawn tlat chuan,RTI ACT hnuaia information rawn diltu te tan dawr kan nuam sawt ngei ang, a ti. Ringtute kan nih angin kan rilru hi rukru lo se, midangten nun tam an neih theih nana nung kan ni tiin sawrkar leh khawtlang ah hian sum kan hman dan te dik leh fel taka min pe theitute hriattir hi kan tihtur a ni, a ti a. Sum kal diklo chungchang sawiin sum kal diklo vangin nunna hialin a tuar thei a ni, a ti bawk.

RTI Week hmanna ah hian huamzau taka sawihona, zawhna leh chhanna hun hman niin Pu CZ Hluna, Vice President, MJA Saiha chuan a kaihruaia, Resource Person Pu John LT Sanga, Addl. DC, Marilyn Rualzakhumthangi, SDO (S) leh N.Vabeiratlua, I&PRO te bakah Department hrang hranga SPIO leh SAPIO ten mipuite zawhna te chu an chhang a ni. Programme kar lak ah zaithiam zai te ngaihthlak ani a, Pi Marilyn Rualzakhumthangi, SDO(S) Saiha chuan lawmthu sawina neiin, he RTI Week hmanna programme hi tihtawp a ni.

He Week hmanna ah hian Department hrang hrang hotute, Tlawmngaipawl hrang hrang hruaitute, School naupang, Saihakhawpui chhunga Village Council hrang hrang Member te bakah Thuthar thehdarh tute an tel kim hle a ni.