October ni 27-31, 2014 chhunga hman mek ‘Right to Information (RTI) Week 2014’ pualin vawiin khan Lunglei-ah pawh I&PR Conference Hall, Bazar Veng-ah hun hman a ni a. Lunglei DC Pu Ashish Madhaorao More chu he hunah Khuallian niin Lunglei District huamchhunga sorkar department hrang hranga SPIO leh SAPIO bakah tlawmngai pawl leh MJA Lunglei aiawhte an kal tha hle a ni.

RTI Week 2014 pual inkhawm DIPRO Lunglei Pi Mina Zoliani kaihhruaiah Khuallian Lunglei Bawrhsap Pu Ashish More chuan mipui rorelna sorkar (democracy) awmna apiangah sorkar langtlang din hi mipuite duhdan a ni a, India-ah pawh kum 1991 chhova ‘economic liberalisation’ awm hnuah mipuite atangin RTI Act hman duhna leh hman tura nawrna a nasa a ni, a ti a. Kum 2005 atang khan India ramah RTI Act hi hman a ni tan ta a, chumi atang chuan ramchhunga sum leh pai chevela thil felhlel deuh awma hriatte leh eirukna lam thil tam tak hailanchhuah a ni ta nghe nghe a ni, a ti. RTI Act-in a tum ber chu mipuite chanvo dik tak peka, mipuite hamthatna tura sorkarin ruahmanna hrang hrang a kalpui dan chungchang India khua leh tui mi tupawhin a hriat duh apiang zawh theia siam leh sorkar lam pawhin chu mimal zawhna chu theih chin china langtlang taka chhan tir hi a ni, a ti. RTI Act awm hma chuan mipui mimirin sorkar office-ah lutin an hotulute chu sawi loh a hnathawk hniamte pawh an be ngam mang ngai lova, amaherawhchu RTI Act chuan mipuite hnenah he chanvo hi a pe ta a ni, a ti a. He Act-in mimal hnenah chanvo lian tak a pek rualin mipuite invenna tur zawka lang chu he Act thiltithei tak hmansual leh midangte tana pawisawi theih zawnga hman hi a ni thung a ni tiin Pu Ashish More chuan mi zawng zawngin fimkhur taka he Act kan hman hi a tul a ni tih a sawi bawk. Rampumah mitin ten rilru dik leh thianghlim chu pu vek ila he Dan awm hi a tul lo tur, amaherawhchu mihring chengho zingah dinhmun inthlau tak tak, zalenna rahbeh saka awmte an awm thin avangin thudik hailang tur chuan RTI Act hi a pawimawh em em ta a ni, a ti.

Lunglei Addl. DC Pu Dolianbuaia pawhin thu sawiin sorkarin mipuite hamthatna tur atana ruahmanna hrang hrang a siam thin ang bawkin RTI Act pawh hi mipuite hamthatna tura siam a ni a, chuvangin RTI Act hmanga zawhna rawn zawt emaw zawhna an thehluhna department emaw pawh nise, mipuite hamthatna leh hmasawnna tur hi dah chungnung leh pawimawh ber tur a ni, a ti. Dan leh thupek kengkawhtu Police leh Excise Department ten boruak muanawm tak awm theih nan theihtawp an chhuahna hnuaia keini sorkar hnathawkte emaw tlawmngai pawl emaw mipui mimir emaw mimal emaw te hian inthawlp tha ila ram leh hnam kalphung chu kan siam tha mai dawn a ni, a ti.

Vawiin RTI Week 2014 inkhawmah hian Pu R.Vanrengpuia, SDO(S) & SPIO, DC’s Office, Lunglei District-in chawhmaah RTI Act chungchang sawizauna hun a hmang a; chawhnu lamah PRISM aiawhin Pu Richard Lalthanzuala’n thu a sawi thung a. Department hrang hrang atanga lo kal SPIO/SAPIO, tlawmngai pawl aiawhte leh chanchinbumiten zawhna leh chhanna hun an hman zui a ni.