Ministry of Home Affairs, Foreigners Division thuchhuah chuan Ministry Circular No. 393 of Dated 30.12.2010 in phalna a pek anga kum 2011 atanga a lo kalpui tawh; heng State pathum Manipur, Mizoram leh Nagaland te Foreigners (Protected Areas) Order, 1958 hmanga Protected Area a puan an nihna thlah dulna chu kumin 31.12.2017 atanga chhiar tana kum nga dang Date 31.12.2022 thleng atan a pawt sei.

He Protected Area thlahdulna hian thil pawimawh dang (conditions) engemawzat a keng tel a, a tlangpui te chu:

1. He Protected Area thlahdulna thupek hi India sawrkar in venhimna thila tul a tih hun apiangah a chawplehchilhin a hnuk kir thei.

2. He thlahdulna hian Afghanistan, China leh Pakistan mite leh heng ram atanga zi chhuak ram dang mi (foreign nationals having their origins in these countries) a huam lova a. Heng mi hian Mizoram, Manipur leh Nagaland te an tlawh duh a nih chuan Ministry of Home Affairs ah phalna an la hmasa tur a ni a, Protected Area Permit (PAP) tel lovin heng State pathumte hi an tlawh tur a ni lo. PAP nei lova an tlawh lui a nih chuan Foreigners Act dan anga hrem tur an ni ang.

3. Foreigners dang heng State tlawhtute chuan State an luh atanga darkar 24 chhungin Foreigners Registration Officer (FRO) ah an in register tur a ni.

4. FRO Office chuan foreigner lo zin te chuan ram dan bawhchhiatna thil an tih leh tih loh an thlithlai zui reng tur a ni.

Myanmar mite pawh kum nga dang PAP tel kher lova heng State te tlawh phalna hi pek an ni a, a chunga mi ang tho hian heng State pathum te visa nei chunga an rawn luh chuan FRO ah darkar 24 chhunga in register ve mai tur a ni ang. Lirthei hmanga heng State te paltlanga, riak/cham khawmuang tur an nih loh phei chuan FRO a in register kher pawh a ngai chuang lo a ni. FRO/State Police ten an cham chhunga an chet dan an thli thlaiin dan an bawhchhiat loh nan an enzui reng tur a ni a, dan bawhchhiatna a awm chuan dan hmang hrem tur an ni ang.