Vawiin khan Aizawl District Swachh Bharat Mission (Gramin) Third Quarterly Meeting 2017-2018 chu an Aizawl DC Office Chamber-ah neih a ni. He meeting-ah hian Swachh Bharat Kosh (SBK) kaltlanga ekin siamthat (repair/ renovate) ngai thlanchhuahte hmalak zui dan tur te leh Sorkar laipuiin India ram puma district hrang hrang SBM(G) rank-ah Aizawl district chu pakhatna dinhmun a hauh thuai theih nana hmalak dan turte sawiho a ni. He meeting-ah hian Pu R.L. Pianmawia, Tuivawl MLA chu a tel a ni.

Meeting khaihruaitu Aizawl DC Dr. A. Muthamma chuan Open Defecation Free (ODF)-ah Aizawl District puan a ni ta chu lawmawm a tih thu leh mawhphurtute thawhrimna chu fak tlak a tih thu a sawi a. Swachh Bharat Kosh (SBK) hnuaiah hian ekin siamthat nan hian pakhat atan cheng sangnga (Rs. 5000) zel dah a ni a. Aizawl District chhunga Swachh Bharat Mission (Gramin) in a huam khua te survey a nih hnu in ekin siamthat ngai hi 3205 awm anga ngaih a ni. Heng bakah hian meeting hian vantlang bawlhhlawh bawm lei belh chungchang leh khaw hrang hranga bawlhhlawh paih danah tawih thei leh theilo thliar hran dan inzirtir leh, a paihna hmunah pawh mumal zawka bawlhhlawh sawngbawl a nih theih nan hmalak dan tur te sawiho a ni.

Sorkar laipuia Ministry of Drinking Water and Sanitation chuan SBM(G) hnuaiah India district hrang hrangte faina kawnga an hmalak dan tehfung hrang hrang hmanga khaikhin in, kumin September thla thlenga a lan dan chuan Aizawl District chu score za ah 89.75 hmu in pasarihna niin, Mizoramah pakhatna a ni. Score 90/100 hmu a pakhatna dinhmun hauh district 51 lai an awm bawk.

Kum 2014 a SBM(G) tan anih hnuah Aizawl District ah chuan ekin 1517 sak a ni tawh a, Aizawl District chu 18.3.2017 khan Ministry of Drinking Water & Sanitation chuan ODF ah a puang bawk a ni. Hemi kum 3 chhung hian vantlang inthiarna 23 siam niin, bawlhhlawh sawngbawlna  hmun 23 ah siam a ni bawk.

He meeting-ah hian Aizawl District huam chhunga SBM(G) kaihhnawih Department hrang hrang atangin Officer an tel a ni.