547/2026-2027

Dated Aizawl, the 15th May, 2026: Vawiin khan National Cadet Corps (NCC) Director General Lt. Gen Virendra Vats, YSM, SM, VSM chuan Level 2, New High Court Parking Complex, MINECO-ah Mizoram puala din NCC Group Headquarters Office thar chu ralkhat aṭangin biakhmuhtheihna (video conferencing) kaltlangin a hawng a. He hunah hian Sports & Youth Services (SYS) Department Director Pu H. Lalhmingthanga, SYS Deputy Director Pi Jennifer Chongthu, DDK Aizawl Director (News) Pu Nampibou Marinmai, NCC Mizoram Group Commander Brig GS Arora, 23 Sector Assam Rifles DIG Brig Pushpendar Sorayan te bakah sawm bik mi pawimawhte an tel a ni.

NCC Group Headquarters thar hawnna inkhawmaah hian Lt. Gen Virendra Vats chuan Mizoram sawrkar chungah te, Brig GS Arora chungah leh NCC Mizoram Group cadet-te chungah lawmthu a sawi a. Hmasawnna ruhrel (infrastructure) tha hian khawiah pawh hmalatute leh ram hruaitute hnathawh a tih chak theih thu a sawi a, Mizoram NCC Group pawhin chutiang hmasawnna ruhrel tha a nei ve ta hi lawmawm tiin Mizoram leh hmarchhak bial pumpui tana hmasawnna thlentu tur a nih thu a sawi bawk. Lt. Gen Virendra Vats chuan thu sawi chhunzawmin, 'Hmarchhak bial kan ngaihthah a nih chuan khawchhak lam kan thlîr thei lo vang', tiin, Mizoram NCC Group cadet-te chu NCC programme hi mi tin huapzo zâwk, thalai tam zâwk telna a nih theih nan leh hnam hrang hrang lungrual taka an tel tlan theihna a siam turin a fuih a ni.

Lt. Gen Virendra Vats chuan hun inthlak danglam zêlah hian Hardware, Software, leh Manpower te tha taka an kaltlan a pawimawh thu a sawi a. Tunah chuan Mizoram NCC Group hian Hardware lam a nei tha tawh a, a dawt lehah chuan Software leh Manpower hmasawnna lam hawi a hun tawh thu a sawi bawk. Pu Virendra Vats chuan Mizoram NCC Group-te hnenah a duhsakna hlanin, a hma thei ang bera Mizoram tlawh ngei a chak thu a sawi bawk a ni.

Vawiin office hawnna inkhawm ah hian NCC Mizoram Group Commander Brig GS Arora chuan Aizawl-a NCC Group HQ te Instagram leh X account a tlangzarh nghal bawk a. Thuchah sawi nghalin Brig GS Arora chuan hei hi a bul tanna chauh a la nih thu leh Mizoram-ah tih tur tam tak an la neih thu a sawi a. Hemi bakah hian an thil tihna apiangah theihtawp an chhuah zel dawn tih a tiam bawk a ni.

Vawiin office hawnna inkhawm ah hian Rev Samuel Lalrinsanga'n hunserh a hmang a; NCC Alumni-te, Cadet tithate (Achiever cadets), leh North Eastern Region-a lawmman dawngtute chawimawina hlan an ni a. Brig GS Arora'n lawmthu sawiin hun a khar a ni.

NCC CHANCHIN TLANGPUI

National Cadet Corps (NCC) hi NCC Act, 1948 hmangin July ni 15, 1948 khan India ramah din niin, an motto chu ‘Unity & Discipline’ (Inpumkhatna leh Inthununna) tih a ni a; naupangte’n zirlai an nih lai atanga mahni inthunun theihna an neih theihna tur te, hmahruai kawngah leh ram leh khawtlang tana mi tangkai leh chhawrtlak an nih theihna tur tea inchher hriamna niin, School leh college hrang hrangahte NCC unit din a ni a. High School leh Higher Secondary School zirlai bakah College kal lai, mipa leh hmeichhia, a duh apiangte tan zawm theih a ni.

Mizoramah chuan NCC hi kum 1964 khan din a ni a, tun dinhmunah Batallion-4 awmin Aizawlah battalion pathum - 20 Mizoram Bn NCC; 1 Mizoram Bn NCC leh 1 Mizoram Air Squadron NCC te awm mekin, Lungleiah battalion pakhat - 2 Mizoram Bn NCC a awm bawk a ni. Heng batallion hrang hrangte hi Silchar Headquarters hnuaiah an awm thin a; amaherawhchu, NCC tihlenna (expansion)plan hnuaiah Mizoram sawrkar chuan January ni 18, 2024 khan Aizawlah NCC Group HQ din turin sanction letter a tichhuak a. Hmalak chhoh nghal niin Group HQ din hna hi July 2025 khan tan a ni a; HQ-a thawk tur officer-te chuan July 2025 atangin an zawm tan a ni. January ni 29, 2026 khan Chief Minister Pu Lalduhoma chuan Group HQ flag a tlangzarh a, a tuk January ni 30, 2026 khan Mizoram Governor General (Dr) Vijay Kumar Singh chuan Aizawl-a NCC Group HQ hi a hawng a ni.

MINECO-a Sports & Youth Services Department Building-ah October ni 25, 2025 atanga May ni 14, 2026 thleng khan an awm lailawk a. Tunah chuan Brigadier thutchilhin Mizoramin NCC Group HQ office nghet a awm tawh dawn a ni.