548/2026-2027

Dated Aizawl, the 15th May, 2026: Vawiin khan CEO Office Chamber, New Secretariat Building, MINECO-ah Election Commission of India in a bik taka electoral roll ennawnna Special Intensive Revision (SIR) thawh thumna a duan chungchangah CEO Dr. Lalrozama kaihhruainain Political Party hruaitute an thukhawm.

SIR neih dan tur schedule chu a hnuaiah hian tarlan a ni:

SCHEDULE OF SPECIAL INTENSIVE REVISION - MIZORAM

CEO chuan Electoral Roll-a dik lo leh fello awm theite enfiahna kawngah official te chuan uluk taka hma an lak tur thu a sawi a. Party hrang hrangte thawhhona pawimawhzia sawiin, vote neihna list dik leh tha neih hi election felfai leh rintlak neihna atan a pawimawh thu a sawi bawk. SIR ah hian kum 2005-a Mizorama Intensive Revision lo neih tawha Electoral Roll leh kum 2025 electoral roll chu enmil a nih thu a sawi a. Kum 2005 E Roll-ah hian voter 5,59,123 awmin kum 2025 E-Roll ah hian voter 8,75,004 an awm thung a. 2005 leh 2025 E-Roll enmila, E-Roll a hming chuang te leh an thlahte mapping tihhlawhtlin zat chu vawiin thlengin 80.54% a ni tawh a, mapping hi neih mek a nih avangin ni tin a pung zel a ni, a ti.

Dr. Lalrozama chuan kar tharah hian District tinah DEO ten Enumeration Form (EF) an print anga, hei hi ni 3 chhunga peihfel tura beisei an nih thu a sawi a. He Enumeration Form nen hian May 30 - June 28, 2026 chhungin BLO te chu in (household) tinah vawi thum aia tlem lo an kal dawn a ni tih a sawi a. Hemi hun chhung hian in lama biak theiha lo awm hram turin CEO chuan mipuite a ngen bawk. Enumeration Form thehlut lo te chu draft roll-ah an hming a chuan dawn loh avangin CEO chuan Enumeration Form thehluh hi ngai pawimawh turin mipuite a chaha, hemi kawngah hian Party hruaitute pawh thu thehdarh kawngah tan la lehzual turin a chah a ni. CEO chuan District tinah ‘Help Desk’ neih tum a nih thu sawiin, DC tinah BLO leh BLA te chu mipuiin awlsam zawka an zawhna leh harsatna te an thlen theihna turin kalpui tum a ni, a ti.

CEO official website ceo.mizoram.gov.in chu hmang tangkai turin CEO chuan mipuite a chah a. He website-ah hian voter list (electoral roll) enna, voter registration, voter ID (EPIC) chungchang enfiahna, polling station hriatna, form hrang hrang download-na leh election notification pawimawhte Mizoram mipuite tan hmuh theih leh hman theihin a awm tih a sawi a. Hemi mai bakah CEO chuan mobile app -ECINET download turin mi tinte a ngen a. He app hmang hian kum 2005 Intensive Revision ah voter ten an hming a chuan leh chuan loh an en thei a. BLO phone theihna te, complain thehluhna te, application thlen chin chhuina (track)-na te leh thil dang tam tak atan a chhawr tangkai theih a ni, a ti.

Joint CEO Pi Ethel Rothangpuii chuan CEO Office chuan September ni 16 2025 khan Political Party zawng zawng (recognized National & State Party) te hnenah Polling Station tinah Booth Level Agent (BLA) ruat tura ngenna a tihchhuah tawh chu ngaipawimawh lehzual turin Party hruaitute chu a chah a. BLA mawhphurhna leh pawimawhzia sawiin, Electoral Roll buatsaihna kawngah anmahni bialtu Booth Level Officer (BLO) bakah Electoral Registration Officer (ERO) leh Assistant Electoral Registration Officer (AERO) te tanpuitu an ni, a ti a. India khua leh tui dik tak Electoral Roll-a hming chuang thei tawh phawt chu hmaih awm lova ziah luh an nih theih nan leh Electoral Roll a chuang lo tur ziah luh an nih loh nana endiktu pawimawh tak an ni, a ti. Politcal Party in BLA an ruat ten ni khat chhungin Enumeration Form 50 aia tam lo an thehluh theih tur thu leh BLA ten claims and objections phase laiin form hi 30 aia tam lo an thehluh theih tur thu a belh bawk. AAP hian BLA an la inruat lo a; BJP -294, INC-1045, MNF-868 leh ZPM -1223, an vaiin BLA 3430 ruat an ni tawh a ni.

Vawiin meeting-ah hian CEO Office atang CEO Dr. Lalrozama, Joint CEO Pi Ethel Rothangpuii, Deputy CEO Pu James Miahlung, Assistant CEO Pi F. Lalnisai leh SIR Media Nodal Officer Pi Lalnunmawii te an tel a. Mizorama Recognised National Party leh State Party hruaitute hrang hrang bakah Registered Unrecognised Political Party hruaitute an tel a ni.