549/2026-2027

Kolasib, 15th May, 2026: Vawiin khan Diakkawn YMA Hall, Kolasib-ah Kolasib Deputy Commissioner Pu H. Dolianbuaia hovin Ruihhlo do awareness campaign leh Kolasib District faina kalpui dan tur chungchang ah hun hman a ni.

He hun kaihruaitu Kolasib DC chuan khawtlang hmangaihtu leh a khua leh tui mi tak tak ruihhlo do tura an kalkhawm chu lawmawm a tih thu a sawi a. He hun hi ruihhlo ngaite chhanchhuah hna leh ruihhlo tihreh dan tur ngaihtuah ho tura hman a nih thu a sawi. He ruihhlo beihna hi hmangaihna, duhsakna leh tih tak takna nen hmalam thlira thatho taka kalpui a ngaih thu a tarlang bawk. Sawrkar hnathawk tam tak chu insawn leh mai tur an nih avangin, khawtlang aiawh lo kalkhawmte chu anmahni khua ngei ruihhlo laka a fihlim theih nana nasa lehzuala tang turin a chah bawk.

Nu leh pate chahin DC chuan, fa fel tak nei te pawhin midangte vangin an tuar thei a, chuvang chuan 'kei chu ka fate an fel' tia tha thlah mai lova khawtlang tana thawh ho a ngaih thu a sawi. Zu vangin mi tam takin nunna an chan tawh a, a bikin mipa an thih hnem em em thu sawiin, "Tun hun hi i hmang tangkai ang u, i thawk ang u," tiin kalkhawmte chu a sawm a ni.

He hunah hian kalkhawmte hnen atangin ngaihdan hrang hrang ngaihthlak a ni a. Mipuiah inzirtirna a la that tawk loh thu leh do tumna tak tak kan neih a ngaih thu sawilan a ni a. Ringtu kan ni angin Isua nena kan do a ngaih thu leh, a tam thei ang ber sikul (school level) ah te awareness kalpui nise tih rawtna te a awm bawk a ni.

Kolasib Superintendent of Police (SP) Pu Lalrinpuia Varte pawhin thu sawiin, ruihhlo ngaite duh dan dana man emaw hrem mai a harsat thu a sawi a. Hremna dan chu NDPS Act-ah a awm a, chumi kengkawhtu tur pawh chu mi ruat bik leh sawrkar notification hrana chhuak an ngai a ni, a ti. NDPS Act hnuaiah hian ruihhlo man zat hi small, medium leh commercial tiin then a ni a. Gram 5 vel man chuan hremna pek nat duh viau mah ila kum khat aia tam an tang thei lo a, gram 250 (commercial quantity) ah erawh chuan a tlem berah kum 10 an tan a ngai thung a ni, a ti. Quantity tlem te man sak phei chu dan hian hremna ai mahin chhanchhuah (rehabilitation) ngai an nihna lam a hawi zawk a ni, a ti bawk.

Asst. Commissioner of Excise & Narcotics pawhin thu sawiin, ruihhlo man dan kalphung (procedure) felfai tak kalpui a ngaih thin thu a sawi a. Engtik lai pawhin ruihhlo kaihhnawihah chuan anmahni biakpawh leh koh theih reng an nih thu a tarlang.

He hunah hian ruihhlo vanga natna hlauhawm darh zel dan tarlan a ni a. Tun hnaia mi 6169 endik atangin HIV vei mi 74 (1.20%) hmuhchhuah an ni a. Heng zinga 58 hi mipat hmeichhiatna atanga kai niin (2 hi homosexual an ni), mi 12 in inchiuna hriau atangin an kai a ni. Nikum financial year chhung khan district chhungah damdawi (ruihhlo) vanga HIV kai mi 395 hmuhchhuah an ni. Kum 2002 atanga kumin January thlengin inchiuna hriau atanga HIV kai hi mi 647 an awm tawh a ni. Tarlan danin, HIV kai atanga 60% te hi mipat hmeichhiatna atanga kai an ni a, 36% te hi inchiuna hriau thianghlim lo hman atanga kai an ni.

Ruihhlo dona kawnga hmalak dan tur hetiang hian rel a ni a, ruihhlo dona kawnga thawk tha ber Village Council leh YMA Branch hrang hrangte inelna buatsaih nise an ti a. Chanchinbu lam pawh ruihhlo dona lam ziak tha te hnenah lawmman pek nise tiin an rel bawk.

Hemi hnu hian faina chungchang programme hman chhunzawm a ni a. Faina leh Solid Waste Management chungchanga hriattur pawimawh te Pi Lalrinchhani, SDC chuan PowerPoint presentation hmangin a tarlang a , kalkhawmte atangin kolasib khaw faina tur atana an ngaihdan hrang hrang an thawhkhawm bawk.

Vawiina he hun hmanah hian Kolasib khaw chhunga zirtirtute, Kolasib khaw chhunga VC member zawng zawngte, tlawmngai pawl hrang hrang aiawhte,  Kohhran hruaitute leh MJA Kolasib District te an tel a ni.