550/2026-2027

Dated Aizawl, the 15th May 2026: Vawiin khan Hulhliap Short Stay Centre atanga chhuakte tana a thlawna Skill Training kalpui mek chu Lianchhiari Run, I&PR Department-ah kharna hun hman a ni a. Social Welfare, Women & Child Development Department (SW&WCD) Minister Pi Lalrinpuii chuan khuallian niin, he training-a zir chhuakte chu certificate semna hun a neihpui.

Minister chuan he Hulhliap Skill Training programme atanga zir chhuakte chu a lawmpui thu a sawi a, an thiamnate chu tipung zel tur leh an kal zelna turah duhsakna a hlan bawk a. Internet khawvela cheng kan nih tawh avangin kalkhawmte chu social media hmanga an thiam thilte an phochhuah thiam a pawimawh tih Pi Lalrinpuii chuan a sawi a. “Midangte nena thawhho thiam hi a pawimawh a, in hnathawh zelnaah pawh rinawmna vawng nung zel chungin taima takin thawk zel ula, chuti chuan hlawhtlinna pawh in chang ngei ang”, tiin kalkhawmte chu fuih a ni.

Pi Lalrinpuii chuan Synod hnenah lawmthu sawiin, Neihbawia an camping centre-te phal taka sawrkar an hmantirna leh an thawhpuina zawng zawng chu ropui a ti a. Hulhliap Short Stay Centre-a Skill Training an kalpuinaah mi 188 laiin an zir zo tawh chu lawmawm a tih thu a sawi a. Sawrkar chuan ruihhlo ngaite chhawmdawl chu a ngaih pawimawh thu leh anmahni hmasawnna tur atana dawm kan zel a tum thu a sawi.

He hunah hian SW&WCD Commissioner & Secretary Pi Lalzarmawii chuan thu sawina neiin, he hun hlu tak a hmanpui thei chu lawmawm a ti a. He Hulhliap Skill Training-a an thil zirte chu mahni kea din theihna hmanrua a nih thu leh chhungkaw chawmna atan pawha hman tlak a nih thu a sawi a. He an thiam thil (skill) zir chhuah chu an damchhung daih a nih thu leh midang pawhin he training hi chhim ve thei se a duhsakpui a ni, tiin Pi Lalzarmawii chuan a sawi a. Eizawnna ngelnghet tak nei thei tura an thiam thil zir chhuah chu an hman theih a beisei a ni.

Vawiin programme hi Mizoram Youth Commission (MYC) Chairman leh Hulhliap Core Committee member ni bawk Pu Malsawmzuala Ralte chuan a kaihruai a. Mizoram Synod Revival Department Director leh Task Group (Aftercare, Skill Training & Handholding, Hulhliap-SSC) member ni bawk Rev J.C Lalramliana chuan hunserh a hmang a. SW & WCD Additional Secretary leh Task Group Convener ni bawk Pu Lalnunhlua chuan lawmthu sawina hun neiin programme hi a khar a ni.

Hulhliap Short Stay - Aftercare, Skill Training & Handholding course hi May ni 4 atanga ni 15 thleng khan neih niin, he training-ah hian skill pathum Assistant Electrician(Batch 5-na), Aluminium Fabrication (Batch 4-na) leh Basic Food Processing (Batch 3-na) te tan zirtirna neih a ni.