551/2026-2027

Dated Khawzawl, the 15th May, 2026 : Vawiin khan Union Minister of State for Consumer Affairs, Food And Public Distribution Pi Nimuben Jayantibhai Bambhaniya chuan sawrkar hotute nen Khawzawl chhunga sawrkar hmun pawimawh leh hmalakna hmun hrang hrangte a tlawh.

National Highway 6 tlawh hmasa berin, NHIDCL hotute chu Highway an sak chhung leh enkawl chhung tur te a zawt a, uluk taka kawng siam leh enkawl hna thawk zel turin a fuih a. Hemi hnu hian KVK Khawzawl a tlawh a, exhibition stall ama puala an lo buatsaih chu lawmawm a tih thu leh lian tham zawk leh school naupang pawhin an chhim theih tura buatsaih ni thei se tiin thurawn a pe a. KVK hmalakna hrang hrang Tomato, Alu leh Nihawi te tha a tih thu sawiin, an hmalakna hnuaia kuthnathawktu mi 5 laiin National Award an dawng thei chu lawmawm a tih thu a sawi bawk a. Office leh a chhehvel fai taka an enkawl dan fakawm a ti hle bawk.

Kawnzara Public Distribution System godown leh Electric Veng-a Fair Price Shop te tlawh lehin, beneficiary-te nen inkawmna hun tawi an hmang a. Ration buhfai inchhek khawl dante a zawt a, buhfai sem a hun tak leh dik taka kalpui zel turin a chah bawk. District Hospital-ah department hrang hrang a tlawh kual a, damdawiin Pharmacy-ah Jan Aushadhi kalpui a ni em tih zawtin, license apply mek a nih thu hrilh a ni a. Ayushman Bharat Health infrastructure mission (PM ABHIM) hnuaia sak (Integrated Public Health Laboratory (IPHL) a tlawh a, serological leh biochemical test chi hrang hrang tih ve theih a nih thu hrilh a ni bawk a. Damdawiin verandah leh compound chhuat chu siam that ni thei se a duh thu a sawi bawk.

A tawp nan Electric Veng Anganwadi Centre leh Khawzawl district chhunga Samagra Siksha hnuaia Primary School awmchhun Little Flower Primary School te tlawhin school zirtirtu leh naupangte nen inkawmna hun an hmang a. Harsatna an neihte zawtin, an harsatnate sutkiana naupangte tan zirna in nuam leh changtlung tak siam chu a ngaihpawimawh hle thu a sawi.