Mizoram pum huap faina hnatlang beihpui thlak tum a ni a. Nimin khan hemi chhungchanga din State Level Committee on Clean Mizoram Movement chu Pu Joseph Lalhimpuia, Parliamentary Secretary, School Education Department leh he Committee Chairman ni bawk hovin New Secretariat Conference Hall-ah an thukhawm a ni.
He meeting kaihruaitu Pu Joseph Lalhimpuia chuan Clean Mizoram Movement kalpui a nih chhoh dan tlangpui sawiin, nikum lam khan Chief Minister hmalakna in Lunglei ah hlawhtling taka hma lak a lo nih tawh thu a sawi a. Pu Joseph Lalhimpuia chuan kan Chief Minister leh kan Education Minister te hma lakna in faina chungchang inzirtirna lamah mihring ngah ber, School Education Department atanga hma lak tha an ti thu te sawiin, February thla atang tawh khan ruahmanna siam a ni a, zawi te te a kal chhovin thil dang tul ngaihtuah ngai te a lo awm bawk si avangin chak taka hma lak a nih theih loh thu te a sawi bawk.
Mizoram hi India ram state-ah kan fai ber thei ang tih ngaihtuahna neiin hetiang hian hmalak a nih thu leh Mizoram sawrkar pawhin Clean Mizoram Movement atan hian November ni 13, 2014 khan hriattirna a tihchhuah thu a sawi a. 14 November, 2014 khan World Diabetes Day leh Children Day denchhenin Health Department leh School Education Department tangkawpin Fitness Run an buatsaih thu te leh hemi ah hian AR Ground ah sikul naupang tam tak hmaah Chief Minister in Clean Mizoram Movement hi a lo hawn tawh thu te a sawi bawk a ni.
Parliamentary Secretary chuan Mizoram hi India rama state fai ber kan nih theih nan mitin in Sawrkar leh tlawmngai pawlte nen thawk hova hma lak a ngaih leh a tul thu te sawiin faina beihpui thlak hi vawihnih khat tih mai a tawk lova, kumtluana tan tlana kalpui tum tur zawk a ni, a ti. Faina beihpui thlak chungchanga tlawmngai pawlte nena thawhdun dan tur ngaihtuahtu Sub Committee din tum thu te a sawi bawk a ni.
Meeting ah hian ram pum huap Faina hnatlang January 2015 thlaa neih tur chungchangte sawiho niin sikul naupangte bakah veng leh khaw hrang hranga tlawmngai pawl hrang hrang te nena thawk hovin hma lak tum dan te sawiho a ni. 3:16 Plan Solution Samsung neitupa Pu Johna’n Clean Mizoram Movement atan hian volunteer te hak tur T. Shirt 1500 leh khua/veng hrang hrang te fai ber thlanna neih atan lawmman Rs. 1,00,000/- a thawh thu ngaihthlak a ni a, hei hi Committee chuan lawmawm a ti hle a ni.
Clean Mizoram Movement ah hian Patron te chu Chief Minister bakah Minister School Education Department, Minister UD & PA, Minister LAD, Minister Health & Family Welfare, Minister Environment & Forest te an ni.
State Level Committee on Clean Mizoram Movement-ah hian Pu Joseph Lalhimpuia chu Chairman a ni a, Pu R. Lalvena, Secretary, School Education chu Vice Chairman a ni a, Pu H. Lalengmawia, Director, School Education chu Member Secretary a ni bawk. District Level Committee 8 pawh DC Chairman na hnuaiah din a ni bawk.
