Green Mizoram Day chu vawiin khan Mizoram pumah hman a ni a, a hmanna lian ber Aizawl District chuan Hmuifang Tourist Complex, Hmuifangah hmangin, Mizoram Governor Lt.Gen (Rtd) Nirbhay Sharma chu khuallian a ni a. Chief Minister Pu Lal Thanhawla chu Khualzahawm a ni. Kumin Green Mizoram Day thupui chu “I dam khawchhuah nan thing phun rawh’ tih thlan a ni.

Governor chuan Green Mizoram Daya tel ve tura Chief Minister-in a sawm chu lawmthu a sawi a. Mizoram chu hringdup angin lang mahse ramngaw tak chu a tamlo tih Chief Ministerin a hrilh thu a sawi a.  Mizoramin thing tiak phun beihpui hun rei tawh taka atanga alo kalpui tawhna hi hmathlir thui tak a neih vang a ni tiin, hei hi Mizoram tan mai nilo rampum tana hlawkna a ni a ti. Thing tiak kan phunte hi an damkhawchhuah ngeina turin uluk taka vil leh enkawl chhoh a tul hle a, district dangah pawh an dam  chhoh ngeina turin thuneitute pawhin hma an lak a tha a ni a ti. Thing phun sponsorna lam te hi uar chhoh deuh deuh tha a tihthu sawiin, tih phurna lam (incentive) te siam tha a tihthu a sawi a. Tlang mite hian khuanu siam in hnaih bik a, an hlutna te tipung turin kan theihna theuhte kan thawh angai a ni a ti.

Khualzahawm Chief Minister chuan thing tiak phun hi chhuan lokal leh zel turte tana chenna nuam leh boruak thianghlim kan siam sakna anih piah lamah, tunlai khawvelin a buaipui ber sik leh sa lo danglam leh boruak lum chho zel siam thatna pawimawh tak a ni a ti a. An puitlin a, an damkhawchhuahna turin a ven him leh enkawlzui an mamawh tih kan hriat a tha a ti a. Thing tiak lak leh phun chu kan awmsam khawp, mahse kan ven him zui thin loh avangin an dam chhuak lo fo a ni a ti. Chuvangin a enkawlzui hi kan zavai mawh a ni a ti.

Chief Minister chuan thing phun pawimawhna kan hre chho zel hi a lawmawm hle a ni tiin, tlawmngai pawlte, school leh college zirlai naupang, abikin NSS naupangte tan laknaah lawm thu a sawi a. Mi pawisak neilo leh roadside reserve ngai pawimawhlo ten kangmei tichhuak a, thing phun sa an tichhe thin hi a pawi a tihthu a sawi bawk a ni.

Green Mizoram Day denchhen hian kangmei venna ti tha zual lawmman, Fire Prevention Awards 2014-2015 chhunga district leh khua tana buatsaih chu Khuallian hian a sem a. Lawmmante hi a inangin district leh khua tan certificate bakah Rs.50,000/-, Rs.30,000/- leh Rs.20,000/- a siam a ni a. Districta ti tha ber Lawngtlai districtin heng lawmman siam bakah trophy an dawng tel a. Pahnihna chu Kolasib ditrict niin, pathumna chu Saiha a ni. Lawmmante hi DC emaw an aiawh ten an dawng a ni. Hengte bakah hian Aizawl district chhunga khua ti tha ber pakhatna lawmman hi Sailutar in a dawng a. Pahnihna chu Tlungvel niin, pathumna chu Phulpui khuain a dawng a ni. District dang zawngah pawh khaw pathum ti tha bikte hnenah lawmman hlan an ni bawk.

Green Mizoram Day hi kum 1998 atanga kalpui tan a ni a. Kum 1999-2014 chhungin thing tiak nuai 36 chuang phun tawh a ni a. A hlawhtlinna hi district  hrang hrangte endiknaah Saiha district chuan 81.21% hlawhtlinpuiin, hlawhtlinpuillo ber Champhai districtin 14.68% a hlawhtlinpui a ni. Vawiina thing tiak phun zat hi a vaiin 390 a ni a, Hmuifang Tourist Complex bakah Lal Thanhawla Parksah te phun an ni. Khuallian leh Khualzahawmte bakah an nupuite, Minister te, Chief Secretary leh senior officials ten an phun a ni. Governor hian Raj Bhawan kawt tualah thing tiak a phun bawk a ni.

Inkhawm Chairman Pu Laram Thanga, IFS, Principal Chief Conservator of Forests & Chairman, State Level Committee on Green Mizoram member Secretary chuan kalkhawmte lawmna thu sawiin,Mizoram State lu ber pahnih an tel hian Green Mizoram Day an ngaihpawihmawhzia a tilang a ni a ti a. A thupui hi tunlai khawvelin a buaipui ber Global Warming siam thatna nen a inhmeh hle a ni a ti.