Vawiin khan Mizoram Rajya Sainik Board meeting  vawi 16-na chu Raj Bhavan-ah neih a ni a. Mizoram Governor leh Mizoram Rajya Sainik Board President ni bawk Pu Kummanam Rajasekharan chuan meeting hi a kaihruai a ni. 

Pu Kummanam Rajasekharan chuan kum kalta chhunga Mizoram Rajya Sainik Board-in sipai bangte leh an chhungte tana hmalakna hrang hrang a neih thu leh chung hmalaknate chuan rah tha a chhuah thu a sawi a. Mizoram sawrkar pawhin indonaa thi leh hliamtuar sipai chhungte tana chhawmdawlna ex-gratia a tihpun thu sawiin, World War II veteran leh hmeithai chhungkua 565 te hnena Rs. 97,09,000/- pek a nih thu a sawi a ni. Amred Forces Flag Day 2017 puala an sum khawnkhawm chu ex-servicemen leh hmeithai chhungkua 39-te hnena hlan a nih thu a sawi a. Sainik School Chhingchhip chuan India rama sipai school zinga a hmasa ber ni turin kum 2018-19 academic session atang khan hmeichhe zirlai naupang a luhtir thu a sawi a ni. Ex-Servicemen Contributory Health Scheme (ECHS) hnuaiah Mizoramah Polyclinic 2 a awm thu sawiin, member 5801 an awm mek a ni, a ti. Governor chuan tun aia zing zawka inhmuhkhawmna neih tha a tih thu sawiin, he Board a mawhphurtu te nen kim taka thurel bawhzuinate thlirho tha a tih thu a sawi bawk a ni. 

He meeting-ah hian member-te chuan 15th Mizoram Rajya Sainik Board meeting, July 5, 2017-a an thurelte nemnghehna neiin, an thurel bawhzuinate an thlirho a. Ex-Servicemen Contributory Health Scheme (ECHS) hnuaia rate awmsa te chu ennawn tha an tih thu sawiin, hei hian hospital leh mimal damdawiin ECHS hnuaia inziaklut duh pawh a tihpun phah tur thu an sawi a ni. Sawrkar laipuia Kendriya Sainik Board chuan Kolasib leh Champhai district-ah te Sainik Welfare & Resettlement department office hawn rem a tih thu tarlan a ni a, Sainik Welfare & Resettlement department hnuaia post ruak hnawhkhah chungchang an sawiho bawk a ni. DG Recruiting NE Region aiawha lokal te chuan October thlaa sipai lak runpui lo awm tura diltu mi 1500 vel chauh an la nih thu sawiin, thalaiten sipai an zawm duh nan sawrkar hotute chu thawhpuiah an sawm a. Assam Rifles hotute pawhin Mizorama an inzarpharhna apianga dilna thehlut duhte tanpui an inhuam thu an sawi a ni.   

Mizoram Rajya Sainik Board meeting zawh hian Mizoram State Managing Committee chu an Chairman Pu Kummanam Rajsekharan hovin an thukhawm leh a. Member Secretary leh Sainik Welfare & Resettlement Department Director ni bawk Surg Lt Cdr (Retd.) Lalnuntluanga chuan kum kalta chhunga an hmalaknate a tarlang a ni. July 5, 2017-a Committee thurel chu nemnghehna an nei a, Amalgamated Special Fund for Reconstruction and Rehabilitation of ESM hnuaia sum dinhmun sawihona an nei bawk a ni.

Vawiin meeting-ah hian Lok Sabha MP Pu CL Ruala, Lt. Col. ZS Zuala, Pu Hmingdailova Khiangte, Mizoram sawrkar leh sipai aiawh official-te an tel a ni.