No.4118/2021-2022
Aizawl, 26th February, 2022 : Mizoram Sorkarin tun hnaia a din, Mizoram Resource Mobilization Committee chuan chak takin hma la nghalin, vawi thum an ṭhukhawm tawh a, hemi an ṭhutkhawm bakah hian sawrkar department pathum- GAD/Deputy Commissioner Aizawl, Taxation Department leh Land Revenue and Settlement Department te an kawm tawh a, hmalak ngaite chak taka hmalak zung zung a nih theih nan, Report and Recommendation pawh a hlawmpuia thehlut lo a, hmalak theihna hmasa te chu lo thehluh a, a tah tawla thehluh chhoh zel an tum a ni.
MRMC in a ngaihpawimawh turte chu sawrkara chhiah non-tax leh tax te kim taka a luh theih nana hmalak a ni a. A hranpaa chhiah thar lak emaw, tihsan emaw an rawt dawn rih lo.
MRMC ngaihpawimawh hmasaah chuan state sawrkara chhiah lut tur Mizorama sumdawngte’n an theh luh loh - mipui, consumer leh customer te’n an pek vek tawh si, sawrkara a chhûngluttu tur (dealers) ten an chhun luh loh - back log, arrears te dap chhuah leh an chhûn ngeina tura hmalak a ni a. Committee in an zirchianna aṭanga a lan danin mipuiin VAT hun laia an pek tawh, dealer-te’n sawrkara an chhun loh tling khawm hi Aizawl District-ah ringawt pawh Rs. Vaibelchhe 63 chuang a awm a, hengte hi Mizoram Public Demand Recovery Act, 2001 hmanga ṭhîn chhuah an nih ngei theihna tura hmalak a ni ang. Dan anga GST lak ngei ngeina tur, lak mumal awm si lo te pawh dan ang taka lak a nih theih nana hma lak te, land revenues te kim zawka a luh theih nana hmalak leh sawrkar revenue reng reng a pelhé loh nana computerised payment system siam te, revenue earning department ten cashless payment leh online payment te an tih ngei theih nana hmalakte chu an hna hmasa a ni ang.
Mizoram Resource Mobilization Committee hi January ni 21, 2022 khan sawrkarin a din a, Pu H. Rammawi, State Planning Board Vice Chairman ni lai chu Chairman atan ruat a ni a, Vice Chairman-ah Pu Liansuama, Ex-Miniter ruat a ni, Member Secretary chu Pu Ramchuana MFAS, Additional Secretary, Finance Department a ni a , member dangte chu, Pu N. Zokunga, MCS (Rtd), Pu Lalthansanga, MFAS (Rtd); Dr Lalrinchhana, Principal Adviser Planning Department; Lalthangliana Varte, Commissioner of Taxes (Rtd) leh Pu P.C. Laldinthara, MIMA Presdent te an ni.
