No.3386/2020-2020
      
Vawiin 23.7.2020 khan Tourism Minister Pu Robert Romawia Royte Office-ah Mizoram Responsible Tourism Policy 2020 duan mek sawihona neih a ni a. Sorkar Official te bakah Tour Operators te, Tickets Agents te leh Hotels neitu pawl aiawhte an tel a ni.

Tourism Minister chuan tunlai mamawh mila Mizoram Tourism Policy siamthar a tul avangin hmalak a ni a, a draft tha tak phochhuah theih a ni ta chu lawmawm a tih thu a sawi. Planning Commission hunlai leh NITI Aayog pawhin Mizoram hmasawnna thlen theitu pawimawh chu tourism sector a nih thu an puang chhuak a, hmasawnna tluantling a taka a thlen theih nan leh Central Sorkar leh Funding partners dangte  puihna dawng thei tura tourism policy siam thar chu tihmakmawh a nih thu a sawi. Minister chuan Mizoram-ah Sorkar hriatpui Tour Guide mumal an awm loh avangin tourists ten harsatna an tawh fo avangin Mizo nula tlangval 20 vel chu Sorkar tanpuinaa Tour Guides training-tir tum a nih thu a sawi a ni.

Mizoram-a sum hmang tam thei tur leh hnemhnanpui tham Tourists te hip turin Star Rated Hotel a pawimawh tih sawiin, Tourism Minister chuan Aizawlah 5-Star Hotel din tum a nih thu a sawi a, Sorkar tan pawh sum lakluhna tha a nih ngei a rin thu a sawi.

Meeting hi Pi Esther Lalruatkimi, Commissioner & Secretary, Tourism Department-in a kaihruai a, Power point presentation hmangin Pu Allan Lalthanzara, Deputy Director-in Draft policy a sawifiah a, pawn lam mi sawm bikte atangin thusawi leh rawtnate awmin sawiho a ni. Tourism Director Pu V.Lalengmawia’n lawmthu sawiin meeting a khar a ni.