No.3385/2020-2020

Vawiin khan St. Joseph Hr. Secondary School, Aizawl chuan kum 2020 HSLC leh HSSLC exam result chhuaka an zirlai titha, top ten-a tling te chawimawina hun an hmang a. Information and Public Relations Minister Pu Lalruatkima chu khuallian a ni.

Pu Lalruatkima chuan zirlai hlawhtling thar te lawmpuiin an hlawhtlinna chhan pawimawh ber chu Pathian a ni tih leh anmahni bakah an nu leh pa te leh zirtirtute thahnemngaih vang a ni tih hre reng turin a chah. Ram ropui leh hnam ropuite dinchhuahna chu taimakna a ni tiin tuna an hlawhtlinna chu a bul tanna chauh a ni tih hriaa taima lehzual turin a fuih a. An nu leh pa te, ram leh khawtlang nghahfak an ni tih hre reng turin a fuih. Information Minister chuan All India Services exam-ah Mizote hi tling turin finna leh theihna kan nei a, tling thei tur erawh chuan taimak leh tumruh a ngai thung tih sawiin zirlai pass thar te chu ngaihtuahna thar hmang turin a chah bawk a ni.

Vawiin zirlai titha lawmpuina hlan te hi HSLC-a pathumna C.R.Lalromawia, pahnihna LH Lalramsangi, Hindi topper Ellen Grace Chinzah; HSSLC Arts a pakhatna Lalhlimpuii, pahnihna Lalrambeiseii, sawmna Lalrinhlua; Commerce a pakhatna Lalhriatpuia Ralte, pangana Lalremruatmawia, pariatna H.Lalmuanawma, pakuana Lalremtluanga, sawmna K.Lalthlamuani; Science stream-ah palina Daniel Zokhumsanga leh parukna Lalrinawma Fanai te an ni.