Phalna nei lova kan Ramngaw leh Nungcha that leh tichereu tute Wildlife (Protection) Act, 1972 dan anga hrem an nih ngei theih nan Mizoram Sawrkar chuan Scheme thar “The Mizoram Rewards for Detection of Forest and Wildlife Offence Scheme 2019” a tichhuak a ni. He Scheme tharah hian mi tupawh phalna nei lova kan ram Thing leh Mau lo kit emaw, la emaw, Ramsa leh Nungcha-te eng hmanraw hmang pawh a, lo that/tihlum te chu Forest Department thuneitute hnenah report theih a ni.

Mizoram chhunga Thing leh Mau, Ramsa leh Nungcha-te lo tichhia/that hria a, Forest Department hnena report-tu hian Lawmman ah Rs.20,000/- thleng a case a zirin a dawng thei dawn a ni. Hetiang anga report Petu hming leh nihna hi thup tlat a ni ang.

Report hi ziakin bialtu DFO ah emaw R.O ah emaw pek theih a ni. DFO leh R.O te biak theihna No. chu EF&CC Department website : forest.mizoram.gov.in ah hmuh theih a ni. Lawmman dawnna tur dilna hi report pek atanga ni 30 chhung in bialtu DFO/R.O ah dil theih a ni e. Lawmman dawng tur chuan bialtu DFO/R.O hnen a report hi a dik ngei a, dan anga hmalak theihna (actionable) turin heng fmfiahna te hi photo/video chiang tawk whatsapp hmang pawhin thehluh theih a ni ang.

Mizoram Sawrkar chuan kan ram Thing leh Mau-te, Ramsa leh Nungchate tha taka humhalh an nih zel theih nan he ‘Scheme’ thar hi hmang tangkai theuh turin zoram mipui zawng zawngte a ngen a ni.

Hemi chung chang hrechiang duhte tan he Phone No. 0389-2025371/0389-2300658 ah office hun chhungin a zawhfiah theih bawk ang.