Lawngtlai District Bawrhsap Pi Shashanka Ala, IAS chuan vawiin khan Lai Autonomous District Council (LADC) Chief Executive Member (CEM) Pu T. Zakunga chu a office chamber-ah len chilhin, LADC huam chhung hma sawnna tur kawng hrang hrang an sawi dun.

Lawngtlai Bawrhsap leh LADC CEM te hian Lawngtlai District-in a pumpui thua tan lak a ngaihna thenkhat bakah, project kal lai mek thenkhat - India leh Myanmar insum dawn tawnna tur KMMTTP kawngpui sial mek chungchang te, Lawngtlaia Girls' Hostel sak tur leh Trade Facilitation Centre sak mek chungchang te an sawi dun a. Bawrhsap Pi Shashanka Ala chuan thingtlang, a bik takin District khawthlang lampanga zirna in kal tha lo lutuk leh nu leh pate'n an fate sikul kaltir nachang an hre lo chu a vei thu sawiin, zirna pawimawhzia tlangaupui leh suma tanpuina lam hawia hma lak a tum thu a sawi a. LADC huam chhung bika hma sawnna hna thawhte pawh khawpui lam chauhva kalpui lovin, thingtlang kilkhawr ber thleng paw'n inkhai rual taka thawh a tul tiin, chumi tur chuan District Administration leh LADC lam hna thawh inhriatpuia tan ho that a pawimawh hle a ni, a ti.

LADC CEM Pu T. Zakunga pawhin Bawrhsapin LADC hna thawh dan hriat duha amah a tlawh leh LADC huam chhung hma sawnna chungchang a sawipui chu lawmawm a tih thu sawiin, ram hma sawnna tur leh mipuite hamthatna tur vei tlang theuh an nih avangin theih tawp chhuaha hma lak ho zel an inhuam thu a sawi a. Ram mipuite tana hna an thawhna kawngah District Administration leh LADC lama hma lakna inthuah leh inkalh a awm loh nan felfai taka inrawn tawn hmasak thin tha a tih thu a sawi ve bawk.

He inkawmnaah hian LADC-a Executive Member i/c Education (Middle School) Pu Laltlawmlova Chinzah leh LADC Executive Secretary Pu H. Lalramenga te pawh an tel a. Bawrhsap hi SDC-te leh DIPRO-in an tawiawm bawk a ni.