Vawiin khan Chief Minister’s Conference Hall-ah PWD Minister Pu Lal Thanzara hovin Mizoram Road Fund Board (MRFB) meeting neih a ni a. PWD Minister hi Mizoram Road Fund Board (MRFB) chairman niin PWD Minister a nih hnua MRFB meeting hmasa ber a ni a. MRFB Vice Chairman Chief Secretary Pu Arvind Ray, IAS leh Member Secretary, PWD Principal Secretary Pu Lalram Thanga, IFS an tel bawk a ni.

Chairman Pu Lal Thanzara chuan kalkhawmte lawmna thu a sawi a. Mizoram Road Fund Board (MRFB) Member Secretary Pu Lalram Thanga chuan Mizoram Road Fund Rules, 2017 tlawh chhanin MRFB hi din a ni, a ti a. PWD hmalakna hrang hrang leh ruahtui vanga harsatnate a tarlang a. MRFB in Fund Source & Collecting agent-a thlanchhuah - Transport department, Taxation department, PWD, Home department, Environment Forest & Climate Change, Geology & Mineral Resources leh AMC  atangin cess, tax, fees, royalties leh fines hmangin kawng enkawl nan sum chhunkhawm a nih thu a sawi a. Meeting-ah hian kum 2018-2019 chhunga kawng enkawlna tur atana sum hman dan tur rel a ni a. Normal maintenance - kawngkhuar khuh thatna, leimin thenfai, kawng ko samfai, kawng bal leh culvert siamthat, lei thawmthat, khawl enkawlna leh kawng enkawlna hna hautak zawkte thawh nan 1^st leh 2^nd quarter atan cheng nuai 224.9 ve ve dah a ni a, hei hian kawng 5137.532 kms a huam a ni. 3^rd leh 4^th Quarter-ah cheng nuai 224.90 ve ve dah a ni leh a. Board chuan quarter li (4)-a normal maintenance atana hman tur sum awm zat hi a pawm a.  Pradhan Mantri Gram Sadak Yojana (PMGSY) hnuaiah hian division hrang hrang-NH DIV-I, NH DIV-V,Khawzawl, Mamit, Saitual, Lunglei, Hmuifang, Champhai, Lawngtlai, Siaha, Tlabung, Kawrthah in hna an thawh nan cheng nuai 135.09 dah a ni a, hei pawh hi Board chuan a pawmpui a. PWD Action plan cheng vaibelchhe 29.36 dah pawh pawm a ni.

Mizoram Road Fund Board (MRFB) hi kum 2017 khan din niin MRFB Executive Committee, PWD Principal Secretary kaihhruaina hnuaiah din a ni a. Mizoram Road Fund Board (MRFB) in chak zawka hna an thawh theih nan Secretariat hran ruahman a ni a. MRFB hian state budget hnuaia sum hmuh hmanna tur te, kawngpui tha zawk a awm theih nana ruahmanna siam te, kawng chhe zawk thuam thatna tura hmalakna tur te an sawi ho a ni. 

Tun dinhmunah hian Mizoramah 7593.5 kms a thui kawngpui kan nei mek a, hemi hnuaiah hian National Highway 1424.5 kms niin State Road hi 4663 kms a ni a. Border Road Organisation hnuaiah 897 kms kawngpui enkawl niin CPWD hnuaiah 176 kms kawngpui enkawl a ni a, hemi bak 433 kms a thui kawngpui department/organisation dangin an enkawl a. State PWD hian 4663 kms kawngpui hi a enkawl mek a, Demand For Grants 2018-2019 atangin cheng vaibelchhe 50 heng kawngpui 4663 kms enkawl nan dah a ni.  

Mizoram Road Fund Board member dangte chu Finance Secretary, Planning Secretary, Law & Judicial Secretary, Transport Secretary, LR&S Secretary, Taxation Secretary, PWD atangin E in C, CE's(Roads, Highways, Buildings), AMC Commissioner, IGP, Transport Director, Stakeholders aiah mi pathum (Zoram Drivers Union, Mizoram Consumers Union, Mizoram Road Transport Union) leh NGO aiawh mi pali (MUP, YMA, MHIP, MKHC) te an ni a. Vawiin hian an tel kim hle a ni.