Vawiin khan Pu John Rotluangliana, Minister, FCS&CA, Transport, Tourism chuan Mamit District Transport Office building thar Cum Staff Quarters Mamit Vengthar ami chu khuallian niin a hawng.

Hawnna inkhawmah khuallian chuan thusawiin hun rei tak hnuah Mamit District tana Office pawimawh tak District Transport Officer Office mahni pual ngeia kan nei tur chu lawmawm a tih thu a sawi a. Mahni in ngeiah thlamuang takin  thawktute chuan mipui rawngbawl hna an thawh theih tawh dawn thu sawiin mipui anmahni dawrtute chu hawihhawmna nena inpe zo taka lo dawngsawng thin tur leh anmahni dawrtute lo thawhsak thin turin a chah a. Tunlai khawvelah Smart Policy nena mipuite indawrtawn a ngaih avangin DTO Office-a Staff zawng zawngte chu Smart tak leh an hnate chu hnehsawh leh hrechiang a, biak nuam taka dawrtute lo thawhsak zung zung thin turin a chah a. Hawihawmna mai piahlamah midangte hriatthiamna tello chuan a indawr tak tak theih loh a. Chuvangin Staff-te chu hriatthiamna nena lo dawngsawnga lo pui thin turin a chah bawk.

Transport Department chuan tun hnaiah hmasawnna tam tak hmu chho mekin District Transport Office thar kan hawn pawh hi mellung pawimawh tak a ni a ti a. District dang Siaha leh Lawngtlaiah te pawh tunah hian District Transport Office Building thar tur sak zawh tep tawh a nih thu a tarlang bawk. Dawrtute tan a awlsam zawk nan Aizawl District Transport Officer pawh pahnihah then niin Urban leh Rural-ah then an ni a. Transport Department hmalaknain eizawnna ngialnghet nei lote tan Aizawl khawpui chhungah Two Wheeler Taxi Service tir mek a ni a. Hei bakah hian Aizawl khawpui chhehvelah Auto Rickshaw tlantir mek a nih thu a tarlang bawk.

Transport Department chu Sorkar Revenue chhungluttu an nih bakah mipui rawngbawltu pawimawh tak an nih thu sawiin tunah hian MST Bus Rate tlawm zawkin hmun hrang hrangah tlantir mek a nih thu a tarlang. Khuallian chuan Aizawl khawpui tan bika Taxi Permit pek chungchang sawiin State Transport Authority (STA) thutlukna angin an Sorkar chhungin Aizawl khawpui chhungah Taxi Permit thar pek an neih miah loh thu a sawi a. Kum 10 tlan tling tawh, replacement registration thar tihsak erawh an neih thu a sawi bawk.

Minister chuan Motor in fit leh fit loh MVI Officers te'n en mai tawh lovin a enna khawl bun tum mek a nih thu sawiin Vaibelchhe 15 hmangin Inspection & Certification Centre Mizoramah bun thuai a nih dawn thu a sawi bawk.

Er. R. Lalrammawia, Jt. Director (Hqrs), Transport Department chuan Technical Report pein Transport Building thar chu PWD Building Division atangin Assestment felfai tak an dawn hnuah Revenue atangin Inspection Certificate leh Land Purchase Board phalna ang thlapa he Building hi lei an nih thu a sawi a. He Building hi Bialtu Minister, Department hotute bakah Sorkar hmalakna  vang liau liau a lei thei an nih thu a sawi.

DTO Office hawn tak hi cheng Nuai 100 senga mimal in saksa lei a ni a. Tunah hian thawktu hi DTO bakah Staff 7 an awm mek a ni. A building hi Floor 5 awmin Office mai bakah Staff Quarters 4 a awm thei dawn bawk a ni.

DTO Office hawnna Programme hi Pu H.L. Rochungnunga, IAS, Commissioner & Secretary, Transport Department-in kaihruaiin Pu R. Remmawia, Director, Transport Department-in lawmthusawina hun a nei a ni.

Attachment

  • Loading attachment...