1114/2022-2023 

Aizawl 1.7.2022: Chief Minister Pu Zoramthanga chuan Mizoram RTI Online chu vawiin khan Assembly Annexe Conference Hall-ah a tlangzarh. DIPR Minister Pu Lalruatkima pawh he hunah hian a tel a ni.

India ram State leh Union Territory zingah RTI Online nei thei pariatna Mizoram chu tihian a ni ta a. Right to Information (RTI) hmanga thil zawhfiah duh nei tuten office pana an kal ngai kher tawhlo a mahni awmhmun atanga smartphone emaw computer hmanga dilna siam mai theih a ni tawh dawn a. Mizoram RTI Online hi website (https://rti.mizoram.gov.in/) ah kalin emaw, mobile phone app Playstore leh App Store atangin Android leh Apple device hmangtute tan a download a hman theih a ni.

Chief Minister Pu Zoramthanga chuan RTI Online tlangzarh a ni thei ta chu lawmawm tiin, Mizoram mipuiin tangkai taka an hman a beisei thu a sawi a. RTI chu ram tan, khawtlang tana tangkaia hmang a, thudik hailanna hmanrua a nih tur hu sawiin, a thalo lam a hman erawh a fuhloh thu a sawi a. Chief Minister chuan khawvel thiamna in hma sawn nasa in, a bik takin technology lama hmasawnna chuan khawvel pum dengchhuakin, ram lian ber leh ram te berte pawh hnai taka a thlunzawm dan a sawi a. Chu hmasawnna chu tangkaia hman thiam a, kan nun a lo awlsam mai bakah mimal leh khawtlang nunin ham sawn theihna tura hman thiam tha a tih thu a sawi a ni.

Vawiin proramme-ah hian Chief Information Commissioner Pu Lalnunmawia Chuaungo, IAS (Rtd.), Mizoram Information Commission chuan kalkhawmte lawmna thu sawiin, RTI chu sawrkar langtlang siamna tur hmanraw pawimawh tak a nih thu leh, RTI Online hian sawrkar langtlang (transparent) leh mawhphurhna hlen tha (accountable) tak a siam belhchhah tur thu a sawi a ni.

Chief Informatics Officer, Information & Communication Technology Dr. Lalthlamuana chuan technical report a pe a. RTI Online software chu MSeGS (Mizoram State e-Governance Society) in a thlawna an siam a nih thu sawiin, ISO certified a nih thu a sawi a. State Data Centre-ah host in, payment gateway hman ni bawkin, office/department te’n treasury-a challan an buaipui a ngaih tawh loh tur thu a sawi. RTI Online tlangzarh a nih hian office pana lehkha hmanga dilna thehluh chu khar a ni dawn tihna ni lovin, online leh offline a ti duhte tan kawng a inhawng ve ve zawk a ni, a ti.

Pu Zorammawia, IPS (Rtd.), Information Commissioner, Mizoram Information Commission chuan lawmthu sawiin hun a khar a. Vawiin programme-ah hian Chief Secretary Pi Manisha Saxena leh sawrkar department hotute, office hrang hranga DAA-te, SPIO-te, SAPIO-te bakah tlawmngai pawl aiawh te an tel a ni.

RTI Online hi a hman dan tur inzirtirna (User Manual) chu RTI diltute leh Office lama lo buaipuitute tana hriat turin RTI website ah dah a ni.

RTI Online-a dilna (application) thehlut duh, smart phone emaw internet connection nei remchang lo te tan Mizoram khaw hrang hrangah Common Service Centres leh Rural Information Kiosks 800-te kaltlangin a in tanpui theih dawn a. Dilna hi a chhuizui (track) theih dawn bawk a ni. Fee chawi ngai pawh awlsam takin Online a pek mai theih tawh dawn a. Department/ office tan pawh RTI dilna bo te a awm tawh dawnlo in, RTI thehluh ni atanga chhan hun chung pawh system in a monitor vek tawh dawn a.