1115/2022-2023 

Tukin khan Environment, Forest & Climate Change (EF&CC) etc changtu Minister Pu TJ Lalnuntluanga chuan Tlawng hnar, Zobawk Lunglei dinhmun leh a humhalh zel kawnga hmalak tul te a hmunah kalin a enfiah a ni.

Minister hi Lunglei HPC Vice Chairman Pu Lawmawma Tochhawng; Lunglei S bialtu MLA Dr K Pachhunga; DFO Lunglei Pu PC Lalchhandama, IFS; PHE SE, Lunglei Circle Er Ngentluanga; leh official dangten an tawiawm a ni.

EF&CC Minister Pu TJ Lalnuntluanga chuan Tlawng hnar humhalh hmalakna kal zelah a kaihhnawih Department official-te leh MLA-te nen hemi chungchang ngaihtuah ho tura a hmuna tlawh an nih thu a sawi a. Tlawng hnar, Zobawkah hian PHE Department hmalaknain tui hna humhalhna kawnga hmalakna - water recharging dam siam tum niin he project hi EF&CC Department hnuaia lui tui humhalhna Dan dinglai te zawm chunga hmalak ho theih dan tur ngaihtuah tura helai hmun hi tlawh ho an nih thu a sawi bawk.

A sawi zelnaah EF&CC Minister chuan lui tui humhalh kawngah Mizoram chuan hun rei tak kalta atangin Dan mumal tak neiin Mizo District Council (Forest) Act, 1955 chu 16/04/1956 ah hriattirna tih chhuah niin hemi hnuaiah hian Mizoram chhunga lui 16 humhalh a ni a. He Act hi Assam Gazette ah 1965 khan tih chhuah leh niin India ram pum huap dan Forest Conservation Act, 1980 hnuaiah heng lui te hi humhalh chhunzawm an nih thu a sawi a. Heng Dan te hi EF&CC Department chuan kengkawhin kum 60 chuang zet Mizoram tuihna leh ramngaw te humhalhin, tuihna kangchat lohnan lui tui humhalh a ni a. Mizoram mipui, NGO hrang hrang leh mimal te Environment humhalh duha hma la mi thahnemngai tak tak an rawn pen chhuak zel chu a lawmawm takzet a ni tiin EF&CC Minister chuan an chungah lawmthu a sawi a, hmalak leh thawhho pui zelah a sawm a ni.

Attachment

  • Loading attachment...