Mizoram Rural Bank (MRB) branch 66-na ni turin Hliappui Branch MRB chu Pu H Rohluna’n nimin khan a hawng a. Hliappui khuain Champhai District pum huapa NLUP-a titha ber nihna leh Mizoram pum huapa Consolation Prize an lak bakah mimal titha Pu Tlanglawma’n Champhai District huapa lawmman pahnihna a dawn te chu an khaw Middle School tualzawlah a khawnawtin an lawm nghal a ni.
Mipui kalkhawm hma-a thu sawiin Minister chuan Bank tha leh rintlak, RBI hnuaia Scheduled II a awm, Mizoram Rural Bank Hliappui khuaa hawn a ni ta chu lawmawm a tih thu leh Hliappui mipui te leh a chhehvel khua Saichal, Pawlrang, Changzawl khaw mipui ten hmang tangkai se a ti a. Bank tangkaizia hriain sorkar pawhin mipui te chawikanna tur hmalakna hrang hrang NLUP, ni za inhlawhna (MGNREGS) leh sorkar laipui scheme dangte chu Bank kaltlang veka thawh a ni, a ti a. A tangkaizia hriain sum an neih ang ang dahkhawl nachang hre turin Hliappui khaw mipui te a chah a ni.
Pu H Rohluna hian Hliappui-a Mizoram Rural Bank hawn tharah hian account a hawng nghal a ni.
Minister Pu H Rohluna chuan a bial chhung Hliappui khuain NLUP-ah Champhai District-a titha ber nihna leh Mizoram pumah a titha ber te zinga mi an ni thei te, sorkar chawimawina hial dawng pha an ni chu chhuanawm a tih thu a sawi a. Rinawmna, taihmakna leh tih tak tak na nei tura a fuih thin chuan an nunah awmzia thuk tak a nei tih a lanchhuah thu sawiin inthlahdul hauh lova mi dangte entawn tlak ni chhunzawm zel tura tang sauh sauh turin a fuih a ni.
MRB, Hliappui Branch hawnna inkhawmah hian MRB, Head Office-a Senior Manager Pu C Lalmuanthanga pawhin thu sawiin Hliappui khaw mipui ten tangkai taka an hman ngei a beisei thu a sawi a. Sumfai neilo tan pawh Vohbik Account (0 balance) an hawn theih thu hrilhin Hliappui khua leh a chhehvel chhungkua te chu account hawng vek turin a sawm a. Core Banking Solution an neih avangin phai lama pawisa thawn tur te pawhin awlsam takin an khua atangin MRB kaltlang hian an thawn thei vek a ni, a ti. MRB chu Mizoram chhunga Branch ngah ber, State Bank dawta sum ngah ber, Mizoram bank awm zawng zawnga account nei ngah ber an nih thu te a tarlang a ni.
Hawnna inkhawm hi Hliappui VCP Pu Lalthaliana’n a kaihruai a, MRB Hliappui Branch Manager Pi H Lalengmawii’n lawmthu sawiin hun hnung a khar a ni.
Minister hian Hliappui khua a Suakphunga Heritage Center sakmek chu a tlawh a. He Heritage Centre, an khaw lal hlui Suakphunga hmingchawia sak hi kum kalta November 17 khan bultan a ni a. Auditorium, Library leh Guest House-te he Centre-ah hian dah a ni ang.
