2091/2022-2023

Aizawl, 27th September, 2022 : Mizoram Rural Bank (MRB) chuan vawiin khan an Head Office, MINECO-ah kum 39 an tlin an lawm a, Land Revenue & Settlement Minister Pu Lalruatkima chuan khuallian niin he hun hi a hmanpui.

He hun puala in khawm buatsaihah khuallian Pu Lalruatkima chuan Mizoram Rural Bank in kum 39 an tling ta chu a lawmpui thu sawiin hemi denchhena Durtlang Special Blind School te Braille typewriter leh Spastic Society te tanpuina sumfai thahnem tak an pe chu ropui a tih thu a sawi a. Mizoram mai ni lo, India ram pumpui anga chhutin Rural Bank hian kan economy ah hmun pawimawh tak mai a luah a, thingtlang kilkhawr ber thlenga inzarpharh a mipuite rawng an bawl chu a ropui a tih thu a sawi a ni.

Pu Ruatkima chuan Rural Bank din chhan bulpui ber pakhat chu Loneitute leh thingtlanga kut hnathawka eizawngte dawm kan a nih vangin an din chhan hi hre reng a, mipuite leh kan ram hmasawnna hi an kutah a in nghat thui hle a ni tih hre chungin tan la zual turin ka chah a kan hna tha taka kan thawh avanga miten min fakna ringawtah hian duh tawk mai lovin, he kan hna hi Pathian leh mipui rawngbawlna a ni tih hre chunga kan thawh zel hi ka duh a ni, a ti.

Khuallian chuan a department enkawl pakhat Rural hnuaia MzSRLM nen hian Mizoram rural bank hian thawh hona thuthlung Self help group chungchangah  25th October, 2017 khan siam a nih bakah Business Correspondent (BC) chungchangah pawh 30th April, 2019 ah khan MoU sign a ni, a ti a. A Department changtu a nihna ang pawhin MRB chungah hian lawmthu tam tak sawi tur a awm tih sawiin, Self help Group 1420 tan  MoU sign a nih atanga vawiin ni thlengin 14 crores lai Loan pek chhuah a ni tawh a, hemi bakah hian Bank awm lohna khua te tan banking service an tih sak a, Self Help Group tan Insurance leh Pension Scheme a buatsaih bawk hi thingtlanga chengte tan a hlu takzet a ni, a  ti a. Mizoram sawrkar flagship Programme SEDP kan kalpuina mekah pawh Mizoram Rural Bank hi kan hmang tangkai em em a. Thingtlang kilkhawr ber thlenga hmasawn tir sawrkar chuan a tum a, chumi ti hlawhtling tur chuan Bank hi a pawimawh a, Pawisa lengvak engkim mai hi Bank kaltlanga tih a nih deuh vek tawh avangin MRB hian branch a nei zau ber avangin a tangkai ber dawn nite pawhin a lang bawk a ni a ti a. Hei bakah hian RD Department hnuaia MNREGS kalpuina kawngah job card holder ten awlsam taka an inhlawhna pawisa an lakchhuah theihna turin branch tam zawk thingtlangah hawnbelh thei ulse a duh thu a sawi bawk a ni.

Pu V. Jaya Chandra, Chairman, chuan MRB hnathawh dan leh dinhmun tlangpui tarlangin khuallian hnenah hian district tinah MRB in anmahni puala office leh staff quarters an neih theihnan ram an mamawh thu a thlen a, hei hi khuallian chuan a theih ang anga lo enzui a nih tur thu a chhangin, MRB tan sawrkar a inhawng reng tih a sawi a ni.

MRB Chairman hian kumthara kum 40 an tlin lawmna tur ruahmanna kal mekah Mizoram mipuite tan an bank kaltlanga hamthatna leh hmasawnna kawnga hmalakna tur programme hrang hrang an ruahman dawn tih sawiin sawrkar leh mipuite thlawpna leh phurpuina a ngen nghal bawk a ni.

Mizoram Rural Bank hi India sawrkarin September ni 27, 1983 ah Regional Rural Bank Act, 1976 hmangin a din a, Scheduled Bank niin, India sawrkarin Commercial Bank dangte nen inanga a ngaih a ni. Tun dinhmunah hian Branch 101 neiin Mizoram chhung District leh RD Block zawng zawng a tuamchhuak vek a. Government of India, State Bank of India leh Government of Mizoram ten neitu nihna intawmin mimal share nei an awmlo a ni. Bank Chairman atan hian sawrkar laipuiin SBI mi leh sa a ruat thin a, Board of Directors te hi Government of India, State Bank of India, Government of Mizoram, Reserve Bank of India leh NABARD atanga mithiam rual ruat an ni.

Mizoram sawrkar hian MRB-ah hian neitu nihna chanvo (share) 15% a neih angin kumtina hlawkna (profit) a siam chu Mizoram sawrkarah chhun luh thin a ni a, MRB a pawisa dah luh leh Bank-in hlawkna a hmuh te hi Mizoram chhungah ngei hman zel a ni. Kum 2011 July thla atangin MRB Branch zawng zawngte chu CBS (Core Banking Solution) system hmanga thlunzawm vek ni tawhin, Mizoram chhung mai bakah India rama Bank zawng zawng te nen awlsam takin a in dawr tawn theih tawh a ni. Tun dinhmunah Mizorama Bank zinga branch ngah ber niin customer nuai 8 chuang an nei a, India ram State hrang hranga Regional Rural Bank zingah an awmna State a RD Block zawng zawnga branch nei vek awm chhun niin, India hmarchhak State zingah Tripura tih lohah chuan a titha ber ni bawkin, hmarchhak state RRB zinga Head Office building nei awmchhun an ni bawk.

Kum 3 kalta chhung khan branch thar 17 an hawng a, hawn belh zel turin ruahmanna an siam mek a, Aizawl khawpui chhung bikah hian branch 22 an nei a ni.