1124/2022-2023

Aizawl 1st July 2022: Vawiin khan Pu Lalchhandama Ralte, Minister, LESDE Department hovin Man Power Development Board Meeting neih a ni a. He hunah hian Pu Zothantluanga, MLA, Vice Chairman, MDB leh Member dang engemaw zat an tel a ni. Meeting kaihruaitu Minister Pu Lalchhandama Ralte chuan Mizo thalaiten an thiamna leh theihna te hmang tangkai a, an hnathawh theih tawk eizawnna tlak an hmuh ngei theih nana sawrkar leh mipuite tanrual a pawimawh zia a sawi.

He meeting-ah hian Labour, Employment, Skill Development & Entrepreneurship Department hnuaia Wing hrang hrangte Achievement Report, Secretary, LESDE hnen atangin ngaihthlak a ni a, Manpower Development Board hmalak tawhna te thlir ho a ni bawk. 

MBOCWWB hnuaia Welfare Board Member-te Covid hri avanga harsatna tawk te, sum leh pai, buhfai leh damdawi in leh in lama enkawl ngaite tanpui an nih dan report kimchang ngaihthlak a ni bawk.

Vawiin meeting hian Govt. ITI, Aizawl, Lunglei leh Siaha hmun te tlawha, hmalakna hrang hrangte leh hmasawnna tur pawimawh la awmte endik turin tlawhchhuah vek nise tiin a rel a. In sakna lama thawktu Mistiri leh Helper-te chungchang sawiho a ni bawk a, heng hnathawktute thiamna endik (Skill Certification) leh Skill Test neihpui tul hle tih thu leh state dang atanga hnathawk lo lut te Survey neih pawh tul thu an sawi bawk a ni.

Mizo thalai, eizawnna nei lote tana eizawnna tlak thiam thil an neih theih nan Skill Training chi hrang hrang kalpui dan turte an rel a, hun remchang hmasa berah bul tan an tum a ni. Heng bakah hian ram pawna Mizo thalai eizawnna hrang hrang thawk tura tirh an nih theih nana tawng zirna, Foreign Language Training Centre, Aizawl-ah din a nih theih nana Delhi-a Embassy hrang hrangte nen thawk hova hmalakna kalpui chhunzawm zel nise an ti bawk.

Attachment

  • Loading attachment...