No.1559/2021-2022
Kolasib dated 26th July 2021: Vawiin chawhnu khan Dr.H.Lalthlangliana, Deputy Commissioner, Kolasib chuan Mizoram Police Duty post, Vairengte thleng a Assam Police thahnem tak lo chhoh chungchangah thutharlakhawmtute kawmin "Mizoram sawrkar chu engti zawng mahin tawlh kan tum lo, kan tawlh ai chuan a nih nih ni turin țan kan la ang" a ti.
Dr.H.Lalthlangliana chuan vawiin chawhma lam khan Mizoram IR Duty Post, Vairengte Autorickshaw stand bul ami chu Assam Police-ten hnehchhuh tum anga ngaih theih turin an rawn chhoh thut chungchanga Mizoram sawrkar chuan kan duty post chin chu tha tawpa hauh a tum thu a sawi. Kolasib DC chuan,” Kan IR Post, Vairengte khu rawn luahlan a min hnehchhuh an tum chuan silai pawh hman mai tur a ni ang,” a ti a,”Kan hmanraw neih ang angin tan tur tiin kan Police-te pawh kan hrilh a ni,” a ti. Dr.H.Lalthlangliana chuan Assam leh Mizoram Police innawrna karah mipui hliam tuar an awm palh vengthawng tak chungin hmalak a nih thu sawiin Mizoram Police lam pawh inchah belh zel a nih thu leh tun dinhmunah Assam Police-te hnung tawlh zawkah an tan mek thu a tarlang bawk a ni. Vawiin boruak thleng chungchanga Mizoram Police tawiawma mipui thahnemngaia tak tak thawkchhuakte chungah DC chuan lawmthu sawiin thuneitute zai ngai chunga fimkhur tak si pheikhai rual tak leh sawt zawk a thawkho zel turin a chah bawk a ni.
Vairengte IR Post atanga tawlh lo tur hian ruahmanna hrang hrang siam a nih tawh thu leh engpawh thleng thei a nih avangin inpuahchahna pawh felfai tak a kalpui a nih thu DC chuan a sawi a Ambulance leh Medical Team-te pawh ruat fel tawh a nih thu a tarlang bawk a ni. Thu belhchian dawl lo theh darh a nih loh nan leh Mizoram Police-te chetlak tithuanawp thei zawnga social media hmang lo turin mitin fimkhur turin a chah a bawk a ni.
Attachment
- Loading attachment...
