4402/2024-2025

Aizawl dated 24th February 2025: Vawiin chawhma khan Secretariat Conference Hall, MINECO-ah Mizoram Sawkar hotute leh 16th Finance Commission member leh Official lo kalte chuan inkawmna hun an hmang a. Pu Lalduhoma, Chief Minister chuan kalkhawmte lawmna thu sawiin Pu Vanlaldina Fanai, Commissioner & Secretary chuan hun a kaihruai a. Minister-te, Chief Secretary, Mizoram sawrkar hnuai a department hrang hrang Secretary leh Director-te an tel a ni.

Chief Minister Pu Lalduhoma chuan Dr. Arvind Panagariya, Chairman leh 16th Finance Commission member-te lawmna thu sawiin vawiin inkawmna hian Mizoram tan hmachhawp duhawm leh hmakhaw eng tak a siam phah ngei a beisei thu a sawi a. Mizoram dinhmun hrang hrangte a tarlang a, ram leilung zau zawng za zela 84 aia zau chu ram ngaw in a tuam thu sawiin leilung hausakna, thing leh mau leh nungchate chenna hmun pawimawh tak a nih bak ah boruak thianghlim min petu leh sik leh sa inthlakthleng nasa lutuk tur vengtu pawimawh tak a nih thu a sawi bawk a ni.

Pu Lalduhoma chuan Mizoram chu tribal hlang deuh thaw chenna, kut hnathawk a innghat tamna State a ni chungin India ram ah ziak leh chhiar thiam tamna State a nih bawk thu a sawi a. Amaherawh chu ram leilung pianhmangin a zir loh avang a inkalpawhna kawng a harsatnate, hmanraw man sang avangte leh Industry lian behchhan tur a awm loh avangtein hmasawnna ruangam duang tur  chuan Sawrkar laipui puihna a tul fo thu a sawi.

Chief Minister chuan Mizoram sawrkar sum lu za zela 83.56 bawr vel chu Tax Devolution leh Grants-in-aid a nih thu sawiin za zela 16.77 vel chauh State chhung atanga hmuh a nih thu a sawi a. State dang a thleng zen zen lo, khuarel chhiatna leimin, ram kang, tui lian leh ruahtui tam vang a harsatna thleng thin te chu Finance Commission chuan a ngaih pawimawh sak a tul thu a sawi.

Vawiin inkawm hona hun ah hian Finance Department atangin Finance Commission hmasa atanga sum hmuh dan leh a hman dan te tarlan a ni a. State Sawrkar Department 29 atanga hmachhawp hrang hrang ruahman a nih dan te ngaihthlak niin mipui hriselna enkawl kawng a ruahmanna te, zirna tihmasawn tur a hmachhawp te, inkalpawhna kawng tihchangtlun a pawimawh thu te leh Sawrkar sum renchem kawng a hmalakna kalpui dan te ngaihthlak a ni a. 16th Finance Commission atangin thalaite thiamna leh theihna (Skill Development) tih pun a nih theih nana rawtna te, Mau hman tangkai lehzual dan ngaihtuah tur a rawtna te, Nursing school leh College changtlung kalpui zel tur a rawtna ngaihthlak a ni a. Mizoram sawrkar atanga rawtna hrang hrangte chu an zirchian tur thu sawiin Mizoram sawrkar ina an lo dawnsawn dan chu lawmawm an tih thu an sawi. 16th Finance Commission-te hian India ram State hrang hrang zirchianna hi kalpui mekin State 18 an tlawh kual tawh a, Mizoram hi State 19 an tlawhna a ni.

16th Finance Commission atanga lo kalte hi Chairman Dr. Arvind Panagariya bak ah member dang Pu Ajay Narayan Jha, Pi Annie George Matthew leh Dr. Manoj Panda-te niin, official pawimawh dangte'n an rawn tawiawm bawk a ni.

Sawrkar laipui leh State sawrkar inkara April ni 1, 2026 atanga chhiar a kum 5 chhung chhiah lak luh insem dan tur zirchiangtu 16th Finance Commission hi India Danpui Article 280 hnuai ah December 31, 2023 khan din a ni a, Chairman bak ah hian full time member mi 4 an awm a ni.