Home Minister Pu Lalchamliana chuan ex-servicemen te chu sawrkarin a ngaihsak reng tur thu leh a thlahthlam dawnloh thu vawiin a Mizoram Ex-Services League General Assembly-cum-Vijay Diwas Celebration, Loch Hall, 46 Assam Rifles battalion headquarters a neih ah a sawi.

Home Minister chuan ram in a ngaihpawimawh hmaak ber chu ram himna a ni a, he hna ropui leh zahawm thawktu, lungmuang taka kana wm theihna tura an thatlai hun hlantu sipaite leh sipai a lo tang tawhte hi an zahawmin an ngaihsanawm a ni a ti a, amah ngei pawh ex-serviceman fapa a ni chu a inchhuan thu a sawi a. Mizoram sawrkar pawhin an nihna a ngaihlu a, an hamthatna tur kawng hrang hrangin a ngaihtuah a ni a ti a, an pension hlawh pawh thla tin Rs. 1200/- ni thin chu 2400/- ah a tihsan sak tawh a, qualified an awm chuan Mizoram sawrkar hnuaiah hna hrang hrang Group ‘B’, ‘C’ leh ‘D’ lak turah 5% hauh sak an nih thu leh, a tul dan anga ngaihnathiamna pawh neih a nih tur thu a sawi bawk.

Home Minister chuan mizo thalaite sipai a tang kan tlem sawt ta lutuk chu a vei thu sawiin sipai officer chin phei chu chhiar tham lek an ni a ti a, mizo thalaite sipaia tang tura fuihna kawngah theihtawp chhuahpui turin ex-servicemen te a sawm a, CRPF battalion mizo thalai hlang awmna pawh neih beisei mek a ni a ti. Mizo sipaite chu an awmna hmun apiangah an hmingtha thin hle a, phai lama mizo awmte pawhin an thlamuanpui thin hle a ni tiin he mizo ze mawi hi chhawm nung zel turin mizo sipai tanglaite a chah bawk a ni.

Tun dinhmunah Mizoram Ex-Services League hnuaiah hian ex-servicemen 5920 leh Assam Rifles ex-servicemen 600 an awm mek a, martar nupui (Veer Narris) 10, hmeithai 4107 an awm. Kum kalta chhungin anmember 31 an boral a, member thar 69 an nei thung a ni. Lunglei, Siaha, Kolasib leh Champhaiah sub-headquarters an nei a, sub-unit 91 Mizoram khaw hrang hrangah an nei bawk a ni. Mizorama TA (Eco) battalion hnih din tur leh Scout battalion din turin sawrkar laipui an nawr mek bawk a ni.

Vawiin inkhawmah hian sipai martar nupui mi 9 hnenah an pasalte ram tana an nunna hlu tak an hlan avangin chawimawina hlan an ni a, heng sipaite hi –

1.       Subedar Laldalliana Lushai, 3rd Assam Regiment, Dinthar, Aizawl (martar ni : December 4, 1971 “Operation Cactus Lily” Indo-Pakistan War)

2.       L/Hav. Sapchhawna, 4th Assam Regiment, Bethlehem Vengthlang, Aizawl (martar ni : September 5, 1988 “Operation Pawan” Sri Lanka)

3.       Sep. Kawlnithanga, 4th Assam Regiment, Zemabawk, Aizawl (martar ni : May 29, 1988 “Operation Pawan” Sri Lanka)

4.       Sep. Lalkhuma, 15th Assam Regiment, Ramhlun North, Aizawl (martar ni : June 29, 19893 “Operation Hiphazat” Manipur)

5.       Sep. Vanlalvena, 15th Assam Regiment, Electric Veng Elim, Aizawl (martar ni : May 5, 1998 Siachen Glacier)

6.       L/Nk. Pachhunga, 4th Assam Regiment, Project Veng, Kolasib (martar ni : February 5, 2000 killed at Sonam Helipad)

7.       Nk. Lalngaizuala, 15th Assam Regiment, Electric Veng Elim, Aizawl (martar ni : March 29, 2009, gun shot fire by terrorsts)

8.       Sep. Samuel Lalremruata, 1st Assam Regiment, Falkawn, Aizawl (martar ni : December 12, 2012, Siachen Glacier)

9.       Sep. Lalchhuanawma, 1st Assam Regiment, Bungkawn Nursery, Aizawl (martar ni : November 27, 1998 “Operation Falkon” Arunachal Pradesh)

46 Assam Rifles ten ex-servicemen te pual hian free medical camp an buatsaih sak bawk a ni.