Vawiin khan Health Minister Pu Lal Thanzara hovin a pisaah Cure Clubfoot Mizoram (CCFM) leh Mizoram sawrkar aiawh ten thawhhona thuthlung (MoU) kum 5 chhung atan an ziak a. Cure Clubfoot Mizoram aiawhin Chairman Pi Zohmingthangi Sailo chuan hming a ziak a, Mizoram sawrkar aiawhin  Pu Lalringa Sailo Jt. Secretary Health & Family Welfare Department chuan hming a ziak bawk a ni. 

Pu Lalringa Sailo Jt. Secretary Health & Family Welfare Department chuan Cure Clubfoot Mizoram in  naupang kelekte tana a hmalakna te chu fakawm a tih thu a sawi a.  Tha taka thawhho chhunzawm zel a beisei thu leh Mizorama kelek nei naupangte enkawl dam annih  zel a beisei thu a sawi bawk a ni. 

Cure Clubfoot Mizoram Chairman Pi Zohmingthangi Sailo pawhin thusawiin Mizoram sawrkar nen kum 5 kaltaa thawhhona thuthlung lo ziah tawh alo tawp dawnah kum 5 dang thawhhona tur thuthlung an ziak leh thei chu lawmawm a tih thu a sawi a. Clubfoot International India Trust (CIIT) chuan India ram chhunga state tin deuhthaw-ah state sawrkar nen thawhhona thuthlung an ziah thu  a sawi bawk a. CCFM chuan Mizoram hmun hrang hrangah clubfoot enkawlna tur  free clinic hawn belh zel tura hma an lak mek thu a sawi bawk a ni. 

CCFM hian Mizoram sawrkar nena thawhhona hnuaiah Lunglei leh Aizawl Civil Hospital-ah kartin Ortho OPD-ah clubfoot enkawlna free clinic  an nei thin a. Ponseti method hmangin kelekte an enkawl a ni. Mizoram bikah hian CCFM chuan nausen leh naupang ke-lek 57 an enkawl tawh a. Mizoram Sawrkar Health Department National Health Mission hnuaia Rashtriya Bal Swasthya Karyakram (RBSK) nen thawkhovin CCFM chuan a thlawnin naupang ke-lek te chu enkawlin pheikhawk bun chi bik te pawh a thlawnin an pe thin a ni. 

Kelek, (Clubfoot) hi pianpui niin zai dam theih a ni a, enkawlna mumal tak nena tih chhoh chuan heng naupangte hian nunphung pangngai neiin engkim an ti thei vek thei a. India ramah hian kum tin naupang 50,000 kelek neiin an piang anga chhut a ni a. CCFM hian Mizoram chhunga kelek nei zawng zawngin enkawlna an dawn theihnan Primary Health Centre kaltlangin awareness campaign an kalpui thin a ni. 

Vawiin MoU ziahna ah hian sawrkar aiawhin Dr. F. Lallianhlira Principal Director, H&FW; Dr Lalhmangaihi Director Hospital& Medical Education leh CCFM aiawhin Capt. Charles Chalrimawia Asst. Secy CCFM; Rev Kapenga committee-member CCFM; Pi Laldinpuii treasurer CCFM;  Pi Chhingpuii committee-member CCFM te an tela RBSK aiawihin Dr. Lalthlengliani a tel bawk a ni.