November 19, 2012 a boral Pu F. Lalbiakmawia Kum 52 Editor, Dumde Nitin Chanchin leh General Secretary Champhai District MJA chu Accredited Journalist anih angin Journalists' Welfare Fund atanga ralna Ex-Gratia Rs 1, 00,000.00, I & PR Director Pu Jim K. Chozah in Mizoram Sawrkar aiawhin Pu F. Lalbiakmawia chhungte hnenah nizan khan a hlan.
Champhai Dist. MJA President Pu Lalhmingmawia Pachuau kaihhruai, ralna hunah hian Pu Jim K. Chozah chuan media kal tlanga ram rawngbawltu zinga mi a boral ta mai chu ram leh khawtlang tan channa nasa tak anih thu tarlangin, a kalsan tak a nupui, a tu leh fate Pathian venna leh awmpuina a dilpui bakah, Mizoram Journalists' Association memberte dinhmun hria a, an tana hamthatna Mizoram sorkarin a ruahman sak chu lawmpuiawm a tih thu a sawi bawk.
MJA Hqrs. President Pu C. Lalrambuatsaiha pawhin, an thawhpui Pu F. Lalbiakmawia'n a boral san ta mai chu MJA memberten an ui thu leh thinlung taka an sun thu a sawi a, Journalists’ Welfare Fund tobul leh nihphung a tarlan bakah MJA hmalakna tlangpui tarlanna a nei nghal bawk.
Pu F.Lalbiakmawia ralna hunah hian Assam Rifles Press Tour (Champhai District fang) a kal, Aizawl Chanchinbu hrang hrang (Aizawl Post, Romei, Morning Post, Youth Herald leh student Outlook) enkawltute leh Champhai District MJA memberte an tel a ni. Tunhnai khan Champhai District MJA in MJA hminga ralna Rs 10,000.00 an hlan tawh bawk a ni.
