Vawiin chawhnu khan Chief Minister Pu Lal Thanhawla chuan Mizoram Amateur Taekwondo Association (MATA) in an pawl kum 25 tlin lawmna Silver Jubilee programme YMA-Hall, Electric Veng-ah an buatsaih chu khuallian niin a hmanpui. He hunah hian Chief Minister nupui Pi Lal Riliani pawh a tel. MATA Silver Jubilee inkhawm ah hian kalkawmte inlawmna thuchah chu Dr. Rualkhuma Colney, President MATA chuan sawiin Pathian hnenah inhlanna hun chu Lt. Col. Lalramhluna, ECM, Mizoram Kohhran Hruaitu Committee in a hmang ve thung a ni.

Pu Lal Thanhawla chuan Mizoram Taekwondo infiammi ten ram pum leh khawvel huapa inelna hrang hrangah thleng phak a, lawmman engemaw zat an la thei a, hei hi infiammi te thawhrawh a nih mai bakah an zirtirtu te leh an mahni kaihruaitu te thawhrimna ti lang tu a ni a tiin an hlawhtlinnaah te lawmpuina leh duhsakna a hlan a. Infiammi te chu hlawhtling tur chuan zuk leh hmuam, zu leh sa leh mahni inthunun kawngah te insum a tawk lova, heng ah te hian an fihlim a tul a, chu chu a hahdam zawk bawk a ni, a ti a. Hetiang bawkin infiammi te kaihruaitu Sports Association hrang hrang hruaitu te pawh entawntlak ni tur chuan heng thilah te hian an fihlim a tul bawk a ni a ti.

Rio Olympics 2016-a infiamna discipline hrang hrangah Mizo infiammi te a tam thei ang ber an tel thei nan Mizoram 2016 Olympic Vision chu ruahman a nih thu sawi langin Chief Minister chuan hemi atan hian sawrkar chuan theihtawp a chhuah tur thu leh hma a lak zel tur thu a sawi bawk. Pu Lal Thanhawla chuan Mizoramin infiamna khawvelah hlawhtlinna hrang hrang a neite chu Sports Minister viak tak hmalakna avangte, Sports administrator te inpekna avangte, Sports Association hrang hrang hruaitute thawhrimnna leh infiammi ten theitawp an chhuah avang te a ni thu sawiin hei hian sawrkar a ti phur hle a ni a ti.

He hunah hian Pu V. L. Sawma, Chief Technical Director chuan Chief Minister Pu Lal Thanhawla chu Black Belt leh Black Belt thawmhnaw man to ber chi a hlan a. Chief Minister hian MATA hruaitu lo ni tawh te hnenah MATA in chawimawina thuziak an buatsaih chu a hlan bawk a ni. Tarlan tawh angin kumin January thla khan Mizoram Taekwondo hmasawnna hriain leh he hemi atan Chief Minister inpeknate hriain amah hi World Taekwondo Federation (WTF) chuan Honorary Black Belt an lo hlan tawh nghe nghe a ni.

Pu Joseph Thansanga, General Secretary, MATA chuan Report pe in kum 25 chhunga MATA in hlawhtlinna leh hmasawnna hrang hrang a neih te chu a tarlang a. Gilead Special School leh Club hrang hrang ten demonstration an nei bawk a. MATA hian an Pawl kum 25 tlin lawmnan hian nimin leh vawiin chawhma khan he hmun vekah hian Taekwondo Festival vawi 2-na an buatsaih a ni.

Tuhnaia Mizoram sawrkarin infiammi titha te lawmman a sem ‘Incentive Cash Award’ a vaia Rs. 64,28,250/- sem takah khan taekwondo player 132 te hian Rs. 23,74,750 an la a. Kum 5 chhung khan infiamna discipline a Mizoram tan medal la tam ber a ni bawk. MATA in kum 25 chhung khan Mizoram pawn atanga medal an lak zat chu 457 (Gold -143; Siver – 128 leh Bronze – 186) niin khawvel huapa inelnaah medal 16 an la tawh bawk. Hemi hun chhung hian khawvel huapa inelnaah taekwondo player leh official 32 an kal tawh a. Tunah hian MATA hnuaia Affilated Club/School/Academy 102 awmin zirlai inziaklut 14,900 vel an awm mek a ni.