Chief Minister Pu Lal Thanhawla chuan Regional Institute of Paramedical and Nursing Sciences (RIPANS) hi ‘Mini India’ a ni a ti. He thu hi vawiina RIPANS in Graduation & Lamb Lighting Hun, RIPANS Open Stage a an neih, a hmanpuina a a sawi a ni.

Chief Minister chuan India hi hnam hrang tam tak, sakhua hrang, tawng hrang leh hnamze hrang hrang chenna anih angin, RIPANS pawh hi Hmarchhak States a hnam hrang hrang ten Nursing leh Paramedicals zira an awmna a ni a. Mahni hnam ziarang pholanna an neih thin hian chen ho a ti nuam mai a nilova, inpawhna leh inunauna tha a siam a, hmarchhak culture leh tradition a chawinung bawk a ni a ti a. Hetianga Graduate te chawimawina hun siam hian graduate tharte leh medical lama hna thawk te tan beiseina leh phurna nasa tak a siam sak thin a ni a ti. Graduation hun kan hman pawh hi theihtawpa an lo zirna thin rahchhuah a ni a, Graduate thar zawng zawngte leh an nu leh pa te hnenah thinlung takin ka lawmpui che u a ni, a ti.

RIPANS a zir zo te hian hna tha tak tak an hmuh nghal deuh zel (placement) thu ah, Chief Minister chuan thil lawmawm tak a ni a ti a. Tunlai khawvelah hriselna tha neih a pawimawhzia tih hria a, health care lam huang zauh zelna ah nurse indaih lohna a nasa chho ve zel a, nursing zir duhna a pun chhoh zel bawk avangin tuna zirlaite chu chhawrtlak ngei ni tura an zirlaite thiam turin a fuih a ni. Chief Minister chuan health care lamah duhkhawp lohna a awm chhoh ve zel bawk avangin Mizoram ngeiah pawh sorkar kum thar chhung ngeia Medical College neih tum a ni a ti a. Cancer hospital changtlung tak siam tura hmalak mek a ni, a ti bawk.

Chief Minister chuan RIPANS hi NEC din a nih thu sawiin, tuna an mamawh em em auditorium pawh an neih theihna turin NEC ah hma lo lakpui a ni ang a ti a. Din tirh anih laia NEC in nasa taka thangduang tura an duh avangin Board Chairman ah an dah thu a sawi a. Hmarchhak hnam te zirna hmun a nih angin, phai lam leh ramdang atanga mi pawimawh mikhual a neih changa zai tur leh lam tura a sawm thin thute a sawilang a ni.

Chief Minister Pu Lal Thanhawla hian Institute Magazine ‘Kaleidoscope’ tih vawi 2-na a tlangzarh bawkin, Graduate te hnenah Proficiency Award a sem bawk a. !st leh 2nd Semester zirlaite hnenah Proficiency Award tho Chief Minister nupui Pi Lal Riliani’n a sem bawk a ni.

RIPANS hi kum 1995-96 khan NEC hnuaiah Autonomous Body ni tura din a ni a. Kum 2007 April thla khan Union Ministry of Health & Family Welfare, Govt of India ah transfer a ni Tunah ah hian kum 4 chhung degree certificate zirna course hrang hrang 5, Nursing, Medical Technology Laboratory(MLT), Pharmacy, Radio Imaging Technology (RIT) leh Optometry te zir theih a ni.