No.6717/2020-2021
India hmarchhak State-a Oil Palm ching hmasa ber Mizoram-a Oil Palm chingtute chuan Oil Palm rah Fresh Fruit Bunch (FFB) Kg khat Rs.5.50-a Godrej Agrovet Private Limited leh Ruchi Soya Industries Ltd te hnena an hralh chu Oil Palm chingtuten hlawk zawka an hralh a, Mizorama Oil Palm chinin hma a lo sawn zel theihna tur leh Prime Minister Pu Narendra Modi-an India hmarchhakah uar lehzuala Oil Palm chin a nih theih nana a hmalakna kal zel tihhlawhtlinna ni pahfawmin Mizoram sawrkar chuan Oil Palm chingtuten a rah Kg 1 an hralhah Rs. 4.50 zelin a pui dawn a, hei hi India rama Commission for Agriculture Costs & Prices (CACP)-in Oil Palm atana Minimum Support Price atan Metric Ton khata Rs. 10,035/- a recommend zulzuia ruahman a ni. Hemi bakah hian sum tam tak senga Oil Palm rah hmin tha leia, Mizorama a hriak sawrna khawl buna hertu Godrej Agrovet Private Limited te tihphur thar nan Kg 1 an buaipuinaah Re.1.00 zelin a pui dawn bawk a ni.
Sawrkar laipuiin Special Assistance for States for Capital Expenditure hnuaia State hrang hrangte sum hman tur a ruahman zingah Mizoram Sawrkar chuan Oil Palm chingtute puihna tur leh Oil Palm rah leia a hriak sawrtute tihphurna turin Cheng vaibelchhe 2 leh nuai 40 a ruahman a. He sum hmanga sawrkarin Oil Palm chingtute leh a rah hertute a puihna hian kum khat chhung daih tura ruahman a ni a, nakum 2021 January thla atanga hman tan tura ruahman a ni.Vawiin khan Pu C.Lalrinsanga, Agriculture Minister leh Pu H.Rammawi, Vice Chairman, Mizoram State Planning Board chuan Video Conference hmangin Kolasib, Mamit, Lunglei leh Serchhip District-a Oil Palm Growers Association hruaitute leh DAO te hnenah he thu hi an puang.
Agriculture Minister Pu C.Lalrinsanga chuan Mizoram chu Oil Palm chin kawngah india hmarchhaka hmahruaitu a nih angin Sawrkar laipui pawhin a hmelhriat thain, hmarchhak State dangte tana entawntlaka hma la chhunzawm zel turin a beisei tih a sawi a, hemi kawnga tangkai berte chu tuna Oil Palm ching mektute leh a hriak sawrtute an nih avangin Mizoram sawrkar chuan an dinhmun leh an harsatna te a hriatpui a, a sutkian dan kawng a zawng zel a ni, a ti. Tuna remchang tak maia Sawrkar laipui atanga sum hman tur lo kal, Agriculture Department-a dah pawh Oil Palm chingtute leh a rah hertute harsatna laka hruai chhuahna atan hman a ni, a ti bawk. Minister chuan hetianga Oil Palm chingtute hmakhua sawrkarin a ngaihtuah chhoh mek avang leh awmze nei zawka Oil Palm chin belh zel a nih theih nana hma la zel turin District hrang hranga Oil Palm chingtute leh buaipuitute chu fuih bawk a ni.
He hun hmanpuitu Mizoram State Planning Board Vice Chairman, Pu H.Rammawi pawhin Oil Palm chu Mizorama chin tan a nih dan leh chhungkaw tam takin an hlawkpui tawh zia te sawiin Mizoram thlai chin zingah a hralhna awmsa thlai awm chhun a nih avangin Mizoram Sawrkar chuan Oil Palm chin hi a dah pawimawh telh telh dawn, a ti a. Oil Palm chingtuten harsatna an tawh te pawh Sawrkar laipui hnenah thlen zel a nih thu te leh a theih ang anga an harsatna te sutkian zel tum a nih thu a sawi bawk.
Hetianga Oil Palm chingtuten hlawk zawka Oil Palm rah an hralh theih tawh dawn avang leh hun rei tak a man ngaia Oil Palm rah an hralh laia Mizoram Sawrkarin duhsak taka Oil Palm chingtute puihna tur sum tam tham tak a ruahmansak hi Oil Palm chingtute chuan lawmawm an tih thu sawiin hetiang a lo nih chuan mi tam takin Oil Palmching tura hma an lak thar an beisei thu Oil Palm Growers Association hruaitute chuan an sawi.
He hun hi Agriculture Commissioner Pu Lalhmingthanga leh Agriculture Director 2 - Dr.H.Saithantluanga leh Pu Rohmingthanga Colney ten an hmanpui a ni.
