No.6718/2020-2021

Dated Champhai, the 1st December, 2020:   Mizoram Sanitation Task Force (MSTF) hnuaia Mizoram khawpui fai inelna, 2020 buatsaih endiktu ‘Panel of Experts’ te chuan vawiin khan Champhai khawpui an endik.

Mizoram sawrkarin endik tura a ruat Panel of Experts te hian tukin atang khan faina kawnga hmalakna hrang hrang khawpui fai, thianghlim leh hrisel din anih theihna kawnga tul angte an enfiah a. Champhai khawpui hmun hrang hranga faina kawnga hmalaknate endikin, District Hospital, Veng hrang hrang leh khawpui chhehvel  Town area huamchhung  khuate an endik a ni.

Khawpui  fangkuala  endikna  neih  anih hnu hian Circuit House Conference Hall-ah faina kawnga hmalakna hrang hrangte inhrilhfiahna leh zawhna leh chhanna hun neih chhunzawm nghal a ni a. He hunah hian Pu Vanlalchhuanliana, DUDO Champhai chuan faina kawnga UD&PA Champhai hnathawh leh hmalakna hrang hrangte a sawizau a. Covid-19 hrileng karah sawrkar inkaihhruainate ngaipawimawh chung zela hmalak thin a ni tiin, Covid-19 laka faina kawnga thawktute himna ngaihpawimawh zual bik anih thin thu a sawi bawk. Champhai khawpui huamchhungah Community Toilet  23 siam anih thu leh ODF Plus dinhmuna hlankai mai theih anih tawh thu a sawi a. September Ni 21,2020 atanga hman tan Champhai Solid Waste Management Bye Laws-2020 hmangin hnawm paihna hmun ni lova paihte hremna atangin  Rs 15,000 chuang hmuh anih tawh thu a tarlang bawk.

Champhai  District Bawrhsap Pi Maria C.T Zuali’n endik tura lokal  Panel of Experts-te  thinlung taka Champhai district mipui te’n an lo lawm thu sawi a. Covid-19 hripui leng karah duh anga hmalak harsa rih mahse faina kawnga hmalaknate district khawtlang hruaitu, NGO, mipui leh Media te’n an thlawp tha hle a ni, a ti bawk.

Panel of Expert-ah hian member pali - Prof. Malsawmliana, Assistant Secretary, CYMA; Dr. Saithantluangi Zote, MIS, IPRO, I&PR Department; Pi R. Lalrinfeli, Programme  Officer, NGC, Mizoram Pollution Control Board leh Pu Lal Rinmawia, Secretary i/c  Organisation, Mizoram Journalists’ Association te awmin, anni bakah hian UD&PA Department aiawhte an tel bawk. Vawiin chawhnu khan  Khawzawl, Khawhai, Biate, North Vanlaiphai, Darlawn leh Aizawlte endik turin Champhai an chhuahsan a. Ruahman dan chuan kar leh khian la endik hmabak Mamit leh Kolasib District chhunga khawpui hrang hrangte an endik leh dawn a ni.

Mizoram Khawpui Fai Inelna 2020 hi Category thuma kalpui niin, category-I-ah district headquarters 11, category-II-ah khawpui (town) dang 12 leh category-III-ah Mizorama khawpui  23 te khaikhawm vek niin an inel dawn a ni.