No.3440/2020-2020

Dated Champhai, the 26^th July, 2020 (Saturday): Mizoram sawrkarin Accredited Journalist boralte ralna a pek thin Ex-Gratia Rs.1,50,000/- chu July Ni 27, 2019  (Inrinni)  a boralta  Pu D.K. Lalhruaitluanga (1980-2019), Editor, Rihlipui Daily Newspaper nupui Pi Laldinpuii hnenah Mizoram sawrkar aiawhin Dr.Lallawmkima, DIPRO Champhai chuan vawiin khan an chenna In Champhai Vengthlangah a hlan.

Dr.Lallawmkima chuan Chanchinbu kaltlanga ram leh hnam rawngbawlna kawnga Pu D.K. Lalhruaitluanga thahnemngaihna leh inpekna chu chhuanawm a tih thu a sawi a. Sawrkar thu leh hla  mipuite hnena  puanzar  kawnga a tha thawhte chu sawrkarin a hre reng tawh dawn a ni, a ti. DIPRO chuan sawrkarin Journalist-te hmakhua ngaiin hamthatna hrang hrang a siam thu a tarlang bawk. 

Ralna hun hi Pu Lalhmingmawia Pachuau, President MJA Champhai District chuan a kaihruai a. Chhungkaw aiawhin Pi Vanlalhmuchhuaki’n thu a sawi a. Pu Lalhlupuia, Vice President, MJA Champhai District chuan lawmthu sawiin hun  a khar a ni. 

Pu D.K. Lalhruaitluanga (L) puala sawrkar ralna buatsaihah hian District Information & Public Relations Office, Champhaia thawkte leh MJA Champhai District member-te an tel a ni. Mizoram sawrkar chuan Accredited Journalist boralte Rs 1,50,000/-  leh  Non-Accredited Journalist boralte Rs 1,00,000/- in a ral thin a ni. 

Pu D.K. Lalhruaitluanga (L) hi Pu R.Laihnuna DK (L) leh Pi Vanlalhmuchhuaki (Tevani) te fa pali zinga a upa ber dawt ni turin June Ni 14, 1980 khan Champhaiah a lo piang a. June Ni 25, 2003 atang khan Rihlipui chanchinbu chhuah tanin, February 2006 ah Mizoram Journalist Association (MJA) Member atan lakluh a ni a. Kum 2012 atangin Champhai District MJA Executive Committee Member-ah lutin, kum 2012-2014 chhung khan Fin. Secretary hna a lo chelh tawh a ni.