No.4112/2021-2022

Aizawl, the 25th February 2022: Vawiin khan Mizoram Science Centre, Berawtlang, Aizawl chuan Polar Satellite Launch Vehicle (PSLV C31) leh Radio Controlled Model Airplane te chu mipuite tana hmuh leh belhchian theih turin a phochhuak a. PSLV C31 model hi Mizoram Science Centre-a technical Staff te kutchhuak niin, a tak tak aiin 1:7 ratio in a te zawk a ni. RC Model Airplane thung hi Innovation Hub, Mizoram Science Centre a Mentors te leh Mizoram Aeromodellers Association te nen tangkawpa duan chhuah a ni.

Heng model pahnihte phochhuahna programme hi Pu Renthlei Hnuna, Curator, Mizoram Science Centre chuan a kaihruai a, Er. H. Lalsawmliana, Chief Scientific Officer leh Member Secretary, Mizoram Science Centre chuan a hmanpui a ni. Pu F Lalramchuana, Senior Curator, Mizoram Science Centre chuan lawmna thu sawiin, PSLV C31 model Mizoramin a nei thei chu ropui a tih thu a sawi a. Mizoram Aeromodellers Association te nen tangkawpa hlawhtlinna an neih theih avanga lawmthu sawiin, hun lo la kal turah pawh thil thar changkang zawk siamchhuah leh zel a beisei thu a sawi bawk.

He phochhuahna hun hmanpuitu Er. H Lalsawmliana, Chief Scientific Officer, Directorate of Science & Technology chuan thusawiin tunlai khawvel thiamna mil zela inher rem a pawimawh a, Polar Satellite Launch Vehicle chu India hmai ti uangtu khawl ropui tak a nih thu leh, tun thla February ni 14 mai pawh khan a vawi 54-na atan kahchhuah leh a nih thu sawiin, satellite tangkai tam tak vansang lamah a dah chho tawh a ni a ti a. Vansang thiamna lama India leh khawvelin hmasawnna nasa tak a neih lai hian Mizo zirlai naupangten hetiang lama min tiphur a min titui thei tur hmuh mai theih tur an nei ta chu a lawmawm a tih thu a sawi a. Mizoram Science Centre staff te pawh an thiamna pholang zel turin a chah bawk a ni. Radio Controlled Model Airplane chungchang pawh sawiin mihring chuan lohna, lei lam atanga thunun tur chi a nih thu leh,he project hi thlawhna design siamdan, her danglam dan te leh a that dan enchhin nana siam niin, helama tuimite bakah zirlai naupangte leh mipuite thinlungah chona leh phurna thar a pek ngei a beisei thu a sawi bawk ani.

Pu Zonunkhuma, President, Mizoram Aeromodellers Association chuan thu sawiin tuna Radio Controlled Model Airplane hi an association in an kut an thawh tawhnaah chuan a lian ber a la ni a, a technique hi a sangin an tan pawh a cho awmin a phurawm hle thu a sawi a. A thla hmawr pahnihte inkar hi feet 14 lai a nih thu leh runway atan pawh metre 200 laia thui a mamawh thu sawiin, lei lama control-tu atanga km 1 leh a chanve a hla ah a thlawh tir theih thu a sawi bawk a ni. Petrol engine 50cc hmangin boruakah a invawrh kang thei a ni a ti bawk. Pi Lalrinnungi, Education Assistant, Mizoram Science Centre chuan Polar Satellite Launch Vehicle chungchangah presentation pein a nihphung leh pawimawhna chi hrang hrangte a sawifiah a, Dr. Lalrinkimi, Education Assistant chuan lawmthu sawiin, hri leng kara hetiang phochhuahna hun an hmang thei chu lawmawm a tih thu leh, hri leng ziaawm veleh mipuite tlawh theih tura Mizoram Science Centre a inbuatsaih reng thu a sawi bawk a ni.