Nimin ni 26.7.2017 khan Aizawl Beraw tlanga Mizoram Science Centre kum 14 tlin lawmna hun chu Chief Secretary Pu Lalmalsawma hovin  hman a ni.

Science Centre kum 14 tlin lawmna hi Dr C.Vanlalramsanga, Secretary, Planning Department (Science & Technology) chuan a kaihruai a. He Centre hi Mizorama awm chhun a nih bakah tute tan pawha inzir theihna leh hriatna tihpunna hmun a nih avangin mipui pawhin tlawh tam thei se a duh thu a sawi. Hemi hun rawn hmangtu Science zirtirtute leh Science NGO te, Science hmasawnna atana sul lo su hmasatute leh lo kalkhawm zawng zawngte chu duhsakna a hlan bawk.

Khuallian Chief Secretary Pu Lalmalsawma chuan Mizote Science leh Mathematics subject lama nasa taka hma an sawn thu leh Science & Technology department a lo din hnua he lamah an thanharh chhoh zel dan a sawi a. Science zirtirtu lo kal khawmten naupangte hnenah science lama tuina leh science kaihhnawih thil ngaihvenna rilru tuh se a duh thu a sawi a. Tunah chuan Science Centre-ah hian zirlaite tan Science theory leh principle tha tak tak a takin hmuh tur a awm a, zirlaite mai bakah mipui mimir tana bengvarna tur thahnem tak a lo awm ta chu lawmawm a tih thu a sawi.

Chief Scientific Officer Dr R.K. Lallianthanga chuan Science Centre din a nih chhoh dan leh Science Centre-a thil tangkai entur chi hrang hrang chungchang a sawi a. Ramngaw awmna Gallery te, science thudik tar lanna ‘Fun Science Gallery’ te, 3D theater mi 40 thut theihna te, pawnlama intihhlimna chi hrang hrang bakah Auditorium mi 120 lenna pawh a awm nghal, hman theih reng a nih thu a sawi a. Tunah hian ‘Innovation Hub’ leh vansang lam zirna hmun ‘Space Education Centre’ pawh sak mek a ni a, peih vat theih beisei a ni a ti bawk. Lunglei-ah pawh Science Centre din tura hma lak mek a nih dan leh a thawh khatna atan NEC leh Mizoram sorkar tang dunin ‘Digital Planetarium’ an din dawn thu a sawi bawk.

Science Centre kum 14 tlin lawmna inkhawmah hian Mizoram Science Centre Governing Body Member te, Mizoram Science Centre Executive Committee Member te, Science NGO chi hrang hrang – Mizoram Science Society te, Science Teacher Association te, Mizo Academy of Sciences te bakah Mizorama Science lama sul lo sutu engemaw zat an tel a. Mizoram Science Centre Curator Pu Renthlei Hnuna chuan lawmthu sawina a neih hnuin, Gallery fankualna leh kalkhawmte en turin 3D Show chhuah a ni bawk.