No.2200/2020-2020

High School zirtirtu inzawmkhawm pawl Mizoram Secondary School Teachers’ Association (MISSTA) member ten kumin May thla hlawh basic pay atanga 5% an thawhkhawm hmanga Ambulance pahnih an lei chu vawiin chawhnu dar 2:00 khan Health & Family Welfare Minister Dr. R. Lalthangliana kutah an hlan a, hemi rual hian COVID-19 do nan Chief Minister’s Relief Fund ah Rs. 10,26,000/- chhunglut nghalin Chief Minister aiawhin School Education Minister Pu Lalchhandama Ralte-in a lo dawn sak a ni.

Ambulance hlanna inkhawm Mizoram Secretariat building no.1 kawt zawla buatsaih- ah thu sawiin Health Minister Dr. R. Lalthangliana chuan MISSTA chungah lawmthu sawiin nimin lamah zirtirtu pawl hrang hrang 10 zet inzawmkhawmna Mizoram Teachers’ Federation kaltlanga Ambulance an dawn nen Ambulance pasarih lai mai an nei thei ta mai chu a ropui takzet a, Chief Minister kaihhruaina leh ruahmanna tha tak hnuaiah sawrkar hnathawkte leh mipuite, kohhran ho leh tlawmngai pawlte lungrual tak maia hmelma tihbaiawm kan hmachhawn ho hi a ropuiin a thlamuanthlak hle a ni, a ti. COVID-19 in eng chen nge min chenchilh dawn hriat a ni lova, Zoram mipuite kan tan mar tlat a tul a, zirtirtute thiltih hi sawrkar hmalakna tichaktu leh tiphurtu a ni a, hei hian kawng hrang hrangin rah tha a chhuah ngei ngeiin ka ring tlat a ni, a ti.

School Education Minister Pu Lalchhandama Ralte pawhin Zoram hmangaih tak taktu zirtirtu mithahnemngaite nen ram rawngbawl hona hun remchang an nei thei chu vannei a intih thu a sawi a, Chief Minister leh Health Minister te rorel thiamna leh kaihhruaina zarah India ram hmun hrang hrangah kan thangmawi a, COVID-19 dona kawngah midangte tana entawntlak ni thei tura mipui leh sawrkar hnathawkten ram hruaitute an thlawp that avanga a lawm thu sawiin, hei hian Mizo nih a ti nuam lehzual a ni, a ti. Zirtirtute inpekna a ropui a tih thu sawiin COVID-19 do kawngah khawtin leh veng tina task force zingah an tel a, ramri a riaklut zingah te, DC tha tichaktuah te leh thil hrang hrangah an tha an thawh nasa em em a, MLA ten CM Relief Fund-ah an MLA Fund an thawh a, hei hi chu mipui pawisa kan kawl atanga kan pek a ni a, zirtirtute erawh chuan an intunnunna tur, an fairel bel thleng tur pawt pengin an hlawh an pawt hek a, Zoram tan an hlan a, an chhuanawm takzet a ni a ti.

Pu Lalchhandama Ralte chuan HSLC leh HSSLC exam hun ruahman chungchang sawiin tum engemaw zat COVID-19 vangin exam hun sawn a ni a, tunah sawrkarin thla thar July ni 1 atanga ni 3 inkarah exam turin ruahmanna a siam ta a, hei hi exam hmachhawn tura inbuatsaih mek zirlaite leh exam buaipuitu zawng zawng ten ngai pawimawh se a duh thu a sawi a. A theih ang anga kaltlangpui a tul chhan chu phai lamah CBSE leh ICSE ten exam hun an buatsaih tawh a, hei vang hian phai lama academic session tan hunah kan inpeihfel ve hman siloh chuan kan zirlai tam takin kum khat an hloh phah thei dawn a ni, a ti.

Vawiina MISSTA in Ambulance pahnih an hlan hi Lunglei Civil Hospital leh Lawngtlai Civil Hospital ami tur a ni a, Lunglei Civil Hospital Ambulance tur hi Lunglei South bialtu MLA Dr. K. Pachhunga hnenah School Education Minister Pu Lalchhandama Ralte-in a hlan a, Lawngtlai Civil Hospital Ambulance tur hi School Education Director Pu James Lalrinchhana’n Lawngtlai East bialtu MLA Pu H. Biakzaua hnenah a hlan thung a ni.

MISSTA member ten May thla hlawh 5% basic pay an thawhkhawm hi Rs. 38,24,581/- a ni a, Ambulance pahnih lei nan hian Rs. 11,98,652/- hmangin insurance leh registration fee an tifel nghal a, Mizoram Teachers’ Federation hnenah Ambulance leina tur Rs. nuai 6 an thawh bawk a ni. Hei bakah hian CM Relief Fund ah Rs. 10,26,000/- an chhunglut a, Aizawl District tih loh District 10 a District Level Task Force te tanpuina atan Rs. nuai 1 theuh sub-headquarters hrang hrang kaltlangin vawiin khan District tinah hlanna hun hman a ni bawk.

Vawiina Ambulance hlanna hun hi Agriculture Minister Pu C.Lalrinsanga, Lunglei District High Power Committee Vice Chairman Pu Lawmawma Tochhawng, Sinlung Hills Council CEM Pu Lalthlamuana Hmar bakah School Education leh Health department officials te, MISSTA member ten an hmanpui a ni.

Mizoram Secondary School Teachers’ Association (MISSTA) hnuaiah hian member 1003 awmin an zinga 6 hi Work Education teacher an ni a, Hindi Teacher 2 an awm bawk. MISSTA member te hi sawrkar zirtirtu vek an ni lem lova, Baptist Hr. Sec. School, Serkawn leh Modern English School, Aizawl zirtirtu te pawh telin sawrkar High School zirtirtu zawng zawng an tel hran lo a ni.

Vawiina Ambulance hlanna inkhawm hi MISSTA Vice-President Pu Zorammawia’n a kaihruai a, MISSTA President Pu Hmingchungnunga leh MTF President Pu Rosangzuala Ralte te’n thusawina hun an hmang a, Pu Robert Lalngaihawma, MISSTA General Secretary in report pe in Pu VR Vulmawia, MISSTA Vice-President-i’n lawmthu sawina in hnu a khar a. MISSTA hruaitute chuan vawiina an hmalakna hi tumahin inchirhthehnan emaw a lo kaihlek sak lo turin mipuite an ngen a, a tul ang zela ram tana thawkchhuak leh turin an inkau reng tih an sawi bawk.

Attachment

  • Loading attachment...