No.2201/2020-2020

Vawiin chawhnu khan Sports & Youth Services Minister Pu Robert Romawia Royte chuan Zoram Medical College, Falkawn tlawhin, inkawmna hun tawite ZMC Administrative Block-ah a neihpui. Minister hi Sports & Youth Secretary Pu H.Lalengmawia, ZMC Registrar Dr. Jane Ralte leh midangten an lo dawngsawng a ni.

Minister Pu Robert Romawia Royte chuan thu sawiin a taka Covid-19 damlo enkawltute leh Covid-19 Test-naa chhun zan zawma thawktute inpekna leh thawhrimna nasa tak chu ngaihsanawm a tih thu leh Mizoram mipuiin an chhuang takzet a ni tih a sawi a. Mizo thalaite zingah Covid-19 damlo enkawl tura hlawh leh hamthatna dang pawh beisei lova district tin atanga mahni inpumpek mizo nula leh tlangval tam tak awmte hian Mizo hnam a timawi a ni, tiin a sawi a. Sorkar ruahmanna hnuaia Task Force te, Kohhran leh NGO ten Covid-19 avanga harsatna sutkian nana an hnathawh te chu ropui a tih thu leh Chief Minister bakah Health Minister ten Covid-19 kaihhnawih mamawhte, Mizoram tana an ruahman zel avangin lawmawm a tih thu a sawi bawk a ni. Covid-19 do letna kawnga Mizo tlawmngaihna leh tanrualna lo lang chu State dang leh Central sorkar meuh pawhin Mizoram chu an fak banglo a ni, tiin a sawi.

Minister Robert Romawia Royte chuan tunlaia Health Department audit chungchangah zawhna tamtak thenkhatin an nei niin, a sawi a, tuna audit kalpui lai mek chu concurrent auditing a nih thu sawiin, Finance Department hnuaia Accounts & Treasuries (A&T) te hi Mizoram sawrkar sum hman dan chhungkua anga audit-tu an ni, a ti a. Covid-19 hripui leng avangin sum la hman ngai lohnaah sum hman ngai tam tak a awm avangin, A&T hian a tih tur dik tak tiin, Health Department te hi a endik pui mai a ni, tiin a sawi. Sports Minister chuan langtlanga sawrkar kalpui mek a nihzia a lang ngei a rin thu sawi bawkin Covid-19 hripui leng vanga sum hman dan audit chungchangah Health Department pawhin Accounting lamah pawh hlawkpuina an neih ngei a rin thu a sawi bawk a ni.

Sports & Youth Services Minister chuan Sawrkai laipuiin sports pawimawhna hriain tun hmaa co-curricular activity ni thin chu curricular activity zingah a telh tawh a ni, tiin a sawi a. Sports Minister chuan ZMC-ah Indoor Stadium, Volleyball court, Basketball Court leh Futsal/Football ground te Externally Aided Project atanga sak a nih tur thu a sawi a. Minister hian Zoram Medical College-a thawkte hnenah Table Tennis Board 2, Table Tennis Bat 4, Table Tennis Ball 10, Table Tennis Net 1, Carrom Board 2, Draught Board 3, Chess Board 3, Chinese Checker 2, Volleyball Net 1, Volleyball 3, Badminton Racket 4 leh Shuttle Cock Box 2 te a hlan nghal a ni.

Horticulture Development Board Vice-Chairman leh Aizawl South III Bialtu MLA ni bawk Dr. F. Lalnunmawia leh Mamit Bialtu MLA Er. H. Lalzirliana te pawhin thu sawiin, Covid-19 positive enkawltu doctor, nurse leh thawktu dangte inpeknaah lawmthu sawiin, fuihna thu tawi an sawi bawk a ni.

Minister hi Sports & Youth Services (SYS) Director Pu Lalsangliana, Football khawvela mizo te ti hmingtha tute S.Malsawmtluanga (Mama), Jeje Lalpekhlua leh midangten an tawiawm a ni.