Law and Judicial Minister Pu Lalsawta chuan “kan ram siamtha turin hnamdang tumah an rawn lut dawn lova, keini ram neitute bak hi kan awm lo. Mizote hi kan tum phawt chuan midang tih ang pawh tha takin kan ti ve thei zel a. Chuvang chuan keini hi ram siamtha tur chuan kan tawk a ni”, a ti. He thu hi vawiina Govt. Mizoram Law College Students Union ten “Freshers’ Social and Felicitation of Graduates”, Tourist Lodge, Chaltlanga neih a hmanpuina ah a sawi a ni.
Minister Pu Lalsawta chuan tunlai khawvelah Court thubuai, Dan kaihhnawih thu inchuhna a tam tawh hle in, ‘Law’ zirna chuan pawimawhna a luah tial tial a, tuna Law Degree nei tharte leh zir mekte hian mamawhtu an neih belh zel dawn a ni, a ti a. Zirlai tharte chu an zirlai an tui taka zir turin leh, regular taka class kal a, thawhrim leh tih tak takna nen kal zel turin a chah a. Zirlai pass tharte pawh an hun lo kal zel turah engpawh lo thleng se, dikna hmachhuan chunga bei zel turin a chah a.
Minister chuan Law Graduate nih vang ringawtin dan zawng zawng tumahin an hriat kim vek phahlo a, amaherawhchu ram leh khawtlanga diklohnate hai lang leh siamtha tura mihring tangkai leh hmanchang hria ni tura inpuahchahna tha tak a ni, a ti a. Mi hriata ‘fel’ nih duh vanga diklo taka thil tih mai a hlauhawm thu sawiin, hun lo kal zelah ram leh khawtlang tana misual leh hnawksakte, mirethei leh hausa thliar hauh lova huaisen taka rorel ngam turin zirlaite chu a chan bawk a ni.
He hun a thusawitu dang Dr. Rualkuma Colney, Govt. Mizoram Law College Principal chuan zirlai tharte chu lawmin, graduate tharte chu an hmabakah a duhsakna a hlan bawk a. Law College-ah chuan zirlai in ziaklut zat leh pass chhuak tak tak zat chu a inthlauh thin thu sawiin, zirlaite chu an zir chhan hre reng chunga taima taka bei tluantling tura fuihin, result tha tak College in a neih belh zel a beisei thu a sawi a ni.
Vawiin hunah hian Fresher atangin leh Graduate tharte aiawhin thu sawi an awm bawk a. Kumin a Govt. Mizoram Law College hi kum 1983-a Aizawl Law College ti a din tan niin, kumin thlengin graduate 300 chuang an awm tawh a. Kum 2010-2011 session atang khan Semester System chu kalpui tan niin, kumin hian Annual System hnuaia zirlai hnuhnung ber (mi pali)-te chu graduate in, kumin session atang College hi Semester System hlanga kalpui ani ta a ni.
