State Climate Change Cell, Mizoram Science, Technology & Innovation Council (MISTIC), Directorate of Science & Technology huaihawtin vawiin khan Aijal Club Conference Hall-ah ‘Workshop on Impact of Climate Change on Mizoram’ neih a ni a; Planning Minister Pu Lalsawta chuan Workshop a hawng.

Workshop hawnna inkhawm Secretary, Planning Dr.C.Vanlalramsanga kaihhruaiah Khuallian Pu Lalsawta chuan khawvel dinhmun hlauhawm tak hian khawi ram pawh a nghawng theih vek avangin Mizoram dinhmun bik zirchian a pawimawh hle a ni, a ti a. Khawvel lum tial tial vanga tui lo tlem zel te, leimin, tui lian, thlipui, khawkheng, a hun lova ruah baw hawk sur te chu ram hrang hranga thil thleng mek a ni a, Mizoram pawh a ralbang thei lo a ni, a ti. Khawvel ram hrang hrangin he thil thleng tur danna leh tihnepna kawng an zawnnaah hian sorkar hmalakna leh ruahmanna tam tak pawh hi sik leh sa danglam chak lutuk venna mila duan deuh vek a ni tawh a, chuvangin mipui pawhin sorkar chu theihtawpa an tawiawm a tul a ni, a ti.

Keynote address sawitu Dr.R.K.Lallianthanga, Chief Scientific Officer chuan ni 30 June 2008 khan Prime Minister hlui Pu Manmohan Singh kaihhruaina hnuaiah boruak, sik leh sa danglam chak lutuk zir tur leh tihnep dan kawng zawng turin ‘National Mission for Sustaining Himalayan Ecosystem’ leh ‘National ‘National Mission on Strategic Knowledge on Climatic Change’ te din a lo nih tawh thu a tarlang a. Boruak, sik leh sa danglam chak tak chuan Mizoram chhunga buh leh thlai (agriculture), ramngaw (forest), hriselna (health) leh tuihna (water resources) chunga nghawng a neih dante chu Workshop-ah zirho tum ber a ni, a ti.

Vawiin Workshop-ah hian Agriculture Director Dr.C.Lalzarliana chuan Technical Session -I a kaihruai a; Dr. Samuel Lalliansanga, Sr. Scientist & Head, KVK Mamit chuan ‘Impact of climate change on Agriculture in Mizoram’ chungchang sawiin Pu F.Lalbiakmawia, Asst Hydrogeologist, PHE chuan ‘Impact of climate change on water resources in Mizoram’ tih thupui a sawizau bawk. Technical Session-II Pu Liandawna, CWW, E&F kaihhruaiah Dr.T.C.Hmingthangi, SNO(Trng), Dte of Health Services chuan ‘Impact of climate chnage on public health in Mizoram’ chungchang sawiin Prof.Lalnundanga, MZU chuan ‘Impact of climate change on forest in Mizoram’ chungchang a sawi thung.