Vawiin chawhma khan Lunglei Circuit House Conference Hall-ah Lok Sabha MP Pu C.L. Ruala kaihhruaiin Lunglei District Level Vigilance & Monitoring Committee neih a ni a. Sawrkar laipuiin District hmasawnna atana hna hrang hrang a ruahman te chu kum kalta chhunga kalpui anih dan leh hmasawnna te thlir ho na neih a ni.

Pu C.L. Ruala chuan member-te hnenah mipui tana rawngbawltu an ni tih hria in sawrkar ruahmanna te chu thahnemngai taka thawk turin a chah a. Sawrkar kut leh ke an nih avangin a hlawhtlinna chu an chungah thui tak a innghah thu a sawi.

Lunglei DC leh DRDA Project Director ni bawk Pu Joseph H. Lalramsanga chuan February ni 15, 2016-a meeting thurel bawhzuia hmalaknate a tarlang a. Sawrkar laipui scheme hrang hrang kalpui mek te chu an hlawhtling dan a tarlang nghal. MGNREGS hnuaiah kum 2015-16 chhung khan ni 72 daih inhlawhna tur cheng nuaih 5317.02 hmuh tawh niin, ni 48 inhlawhna siam a nih tawh thu a sawi a. Sum dawn tlai avangin ni 24 atana inhlawhna siam leh vat beisei a nih thu a sawi bawk.

Indira Awas Yojana (IAY) hnuaiah Lungleiah in 97 sa tura ruahman atangin in 72 sak zawh tawh a ni a. Swachh Bharat Mission (Gramin) hnuaiah RD Block pali – Lunglei, Lungsen, Bunghmun leh Hnahthial ah Individual Household Latrine (IHHL) 1651 sak a nih thu leh Border Area development Programme (BADP) kaltlanga project hrang hrang kalpui a nih thu a sawi. Integrated Watershed Development Programme (IWMP) tih a koh thin, Pradhan Mantri Krishi Sinchayee Yojana (WD) tih a hming thlak tak, Prandhan Mantri Gram Sadak Yojana (PMGSY) leh National Social Assistance Programme (NSAP) hnuaia hmalaknate tarlan a ni bawk.

National Health Mission kaltlangin Infant Mortality Rate (IMR) a tlahniam chho zel a. Janani Suraksha Yojana (JSY) leh Janani Shishu Suraksha Karyakaram (JSSK) kaltlanga nu leh nausen te hnenah hamthatna pek an ni. Sarva Shiksha Abhiyan (SSA) hnuaiah zunin 121 sak tawh niin kum thar atangin sikul 20 thawmthat hna kalpui mek a ni. Rashtriya Madhyamik Siksha Abhijan (RMSA) hnuaiah zirtirtute leh zirlaite capacity building hranga hrang kalpui a ni a. P&E Deparment erawh chuan Intergrated Power Development Scheme hnuaiah sum an la hmuh ve loh avangin hna an la tan theilo a ni.