Kawng hrang hranga Mizoram tihlar leh pholan a nih theih nan vawiin khan hetiang lamah sulhnu thui tak nei tawh company - Innovations India Advertising & Events Pvt. Ltd. leh Mizoram Sawrkar in thawhhona thuthlung (Memorandum of Understanding) an ziak a, Mizoram Sawrkar aiawhin Chief Secretary Pu Lalmalsawma leh Innovations India aiawhin Pu Rahul Sudesh Bali, Managing Director ten hming an ziak. 

MoU chungchangah tukin zing khan Captain Bali leh Information & Public Relations Department enkawltu Minister Pu Lal Thanzara chu a Pisa-ah an inkawm a, hma lak an tum dante a hrilh a. Mizoram chu hmun nuam, sik leh sa nuam tha tak nei, state ralmuang leh muanawm leh state mawi tak a nihna chu India leh ram dangah zau takin theh lar leh pholan (market) an tum dan kawng hrang hrang sawi a ni. 

Information & Public Relations Minister Pu Lal Thanzara chuan MoU hian khualzin tam zawk hipna kawngah te, company ten ‘event’ lian tham Mizorama an nghah thei nan te leh company ten film leh advertisement (fakna) shoot nana Mizoram an hman theihna kawngah te thil tha tak leh tangkai tak a nih a beisei thu a sawi a. Mizoram khawpuia lirthei tlan ten horn an hmeh rik lo (no-honking culture)-te leh Mizorama nghahloh dawr a awm thu te chu media hrang hrangah thehlar a ni tih sawiin, heng thil dangdai hmun danga awm lo te hi an marketing strategy a telh turin Captain Bali hi thurawn a pe a ni. 

Innovations India Advertising & Events Pvt. Ltd. aiawhte chuan Planning Secretary Dr. Vanlalramsanga hmu bawkin hma lak an tum dan te an sawiho a. He MoU ziahah hian Innovations India company chuan kum thum chhung Mizoram chu India ram leh pawnah campaign leh hmalakna dang hrang hrang hmangin thehlar hna an thawk ang a. Mizoram thalai te tan pawh hmasawnna tur tam tak he hmalakna hian a thlen ngei beisei a ni bawk.