Kolasib constituency Bialtu MLA Pu PC Zoram Sangliana hmalakna in  Kolasib-ah Deputy Commissioner, District Civil Hospital leh Medica Superspeciality Hospital, Kolkata tangkawp buatsaih chuan Kolasib District Hospital OPD Building-ah vawiin khan Free Medical Camp an nei. 

He Free Medical Camp hi Kolasib Bialtu MLA Pu PC Zoram Sangliana’n  a hawng a. Hawnna inkhawmtawi neihah bialtu MLA chuan Kolkata Medica superspecialist te chu ama kal thlaksaktute leh enkawl damtu te an nih thu a sawi a. Aizawl Civil Hospital ah khawl tha tak tak a thlawnin an lo pe tawh bawk a ni tiin,  a ngenna ngaipawimawha Kolasib ah Free clinic an rawn nei thei chu lawmawm a tih thu a sawi a. Bialtu MLA chuan vawiina damlo inentir te chu Doctor ten damdawi an chawh ang angte  MLA fund atanga a tumsak tur thu a sawi bawk. 

He Medical Camp-ah hian Medica Superspeciality Hospital, Kolkatta atangin Dr. Dilip Kumar Pahani, Sr. Consultant, Nephrology (kal lam doctor) leh Dr. Saurren Panja, Sr. Consultant, Internal Medicine te bakah Kolasib District Hospital atangin Dr. H.C. Lalnunhlua, Medicine te an thu a ni. 

Vawiin hian Damlo inentir tur Medicine ah 78 leh Kal lam ah mi 50 inziaklut an awm a ni.