Vawiin chawhnu khan NLUP Conference Hall-ah Central Young(CYMA) Mizo Association(CYMA) buatsaih in Chief Minister Pu Lal Thanhawla, Dan leh Ruihlo kaihnawih thil a Nodal Department Minister leh sawrkar hotulian te, CYMA hotute leh kohhran hruaitute chu ruihlo vanga Mizoram in harsatna liantak a tawh mek te engtia hmachhawn zel tur nge tih inrawnkhawmna an nei. 

Ruihlo chungchanga inrawnkhawmna hi CYMA President Pu Lalbiakzuala'n a kaihruaiin inrawnkhawmna hun hawn nan CYMA General Secretary Pu Lalhmachuana'n inrawnkhawmna neih an duhchhan te a sawifiah hnuah CYMA Vice President Pu Vanlaruata'n thlalak leh thu hmangin Mizoram a ruihlo kaihhnawih harsatna , ruihlo ngaite enkawldan leh ruihlo tawlh/zuartute hremna chungchang a tarlang hmasa a ni. 

Sawrkar aiawha rawtna siamtu Chief Minister Pu Lal Thanhawla chuan Mizoram runtu ruihlo in pawi nasa zawk a khawih loh na tura an hun pum hmangtu YMA inpekna leh an hlawhtlinna ah Mizoram mipuite an thlamuan thu leh lawmawm a tih thu a sawi hmasa a. Ruihlo chu hnam hmelma hlauhawm tak thalai te  leh naupang duhawm tak tak te thlenga suattu a nih avangin YMA chauh ni lovin sawrkar, kohhran, khawtlang leh chhungtin te thukhat vuaa do chhunawm a pawimawh tih a sawi a. Ruihlo chu dan zawh famkima do theih pawh a nih loh avangin ruihlo zuartute pawh rei hrem an ni thei lova a rilru nat thlak tak zet a ti a. Ruihlo tawlh tute leh zuartute danbeh an nih a hremna na zawk hmachhawn tir an nih theih nan dan hremi te leh ukil te pawh hnam rilru pu in ruihlo case bikah chuan eizawnna thil pawh ni se kutsil ngam tawh turin Zoram mipui ten kan ngen tak meuh a ni a ti. 

Chief  Minister chuan heti khawpa ruihlo avanga Mizoram a buaina chhanah hian society pawh inbihchian kan ngai tawh niin a sawi a. A pakhatna Mizoram in a hauh tamzawk te chu sawingam loh thil - cancer, HIV, naupang kumtlinglo khuaikhem, ram tih kan leh a dang te ah a nih avangin nun inuluk tura pianthar a hun tawh a ni a ti. Ruihlo siamna hmunpui Golden Triangle hnaih a Mizoram a awm aavng te leh state ralmuang a nih avanga ruihlo tawlhna kawngpui atana misualte hman tangkai awlsam a nih avangin invenhimna hna thawk turin sawrkar, kohhran leh tlawmngai pawlte chu indahawl bik awmlova, a lungthukim a tan ho a ngai a ti a. YMA in ruihlo a do chu theihpatawp a thlawp zel a tum tih a sawi a. Ruihlo ngaite chhawmdawl a, an nun siamtha tura tu hnen atang mah a tanpuina phut lo correction home zawng zawng te chu mi thenkhat sawiselna karah pawh hnatha thawk chhunzawma, insiamthat angaihna lai te pawh insiamtha tura sawm in sawrkar in a thil tih ropui tak te chu sawrkar in a thlawp a ni a ti a. Ruihlo hian damdawi hmadikloh a kawk deuh ber a; mahse vaihlo zuk leh hmuam vanga Mizoram a thi an tam em em bawk avangin YMA leh kohhran ang pawn vaihlo zuk leh hmuam pawh do tel nghal a pawimawh hle a ni a ti. 

Sawrkar in ruihlo vanga Mizoram harsatna chu a ngai thutak hle a ni tih sawiin Chief minister pu Lal thanhawla chuan ngaihtuahna thar a siam mek tih a sawi a.  Ruihlo do tih Kumpuan thupuiah YMA in a siam thin a vanga hlawhtlinna tam tak awm chu a aia sawt zawk a la awm rih lo ni a ngaih theih a ni a ti  a.  Ruihlo in pawi lian tham zawk a siam loh na turin sawrkar pawh in ruihhlo do puan chu thil sawt zawk ah a ngai a nih chuan inrawnkhawm hnuah a puang anga. Hmalak chhunzawm zel dan turah CYMA leh Kohhran thawhpui an ni ang a ti. 

Ruihlo kaihnawih a CYMA in inrawnkhawmna a buatsaih ah hian Home Minister Pu R. Lalzirliana, Excise & Narcotics Department enkawltu ni bawk, Law Minister Pu Lalsawta, Social Welfare Minister Pu PC Lalthanliana, Health Minister Pu Lal Thanzara, Law Parliamentary Secretary Pu KS Thanga, Official te, kohhran hruaitute leh YMA hotu ten an ngaihdan sawiin rawtna an thawh a ni. 

CYMA in statistics a lakhawm in a tarlan dan chuan- kum 1984 atanga kum in August thla tir thleng khan ruihlo vanga thi Mizoramah mi 1,456 an awm tawh a, heng zinga mi 156 te chu hmeichhia an ni. Tun dinhmun ah Mizoram chhunga Home/Centre leh Jail-ah te ruihlo a talbuai mi 2080 lai an awm a. CYMA hnuaia SRS hmalakna chuan aizawl khawpuiah  ruihlo zuartu man nawn hlawh deuh mi 10 vel an awm tih tarlangin an tan rei loh thin zia te a tarlang a. Tangreilo ber phei chu ni 1 pawh a tang lova. Heng zingaah hian vawi 6 man nawn a vawi 6 tang nawn te pawh an awm a. Hetih lai hian Myanmar atanga Mizo hnathlak ruihlo rawn tawlhtu lian lian deuh deuh mi 8 an awm a; kum 2005 atang 2017 thlenga YMA in Heroin an man tawh zat chu hawng 752, kg 12 hu a tarlan a ni.